ზუგდიდის მუნიციპალიტეტის მერი დავით კოდუა შეიო მესამეს კათოლიკოს-პატრიარქად არცევას ულოცავს:

„დღევანდელი დღე ისტორიული მნიშვნელობისაა სრულიად საქართველოსთვის. მეუფე შიოს სრულიად საქართველოს კათოლიკოს-პატრიარქად არჩევა არის უდიდესი პასუხისმგებლობა და იმ სულიერი გზის გაგრძელება, რომელიც ათწლეულების განმავლობაში უწმინდესმა და უნეტარესმა ილია II-მ სიყვარულით, სიბრძნითა და ეროვნული ერთგულებით შექმნა.

მრავალი წელია, მეუფე შიოს სულიერი გზა, თავმდაბლობა, განათლება და ეკლესიისადმი ერთგულება საზოგადოების განსაკუთრებულ პატივისცემას იმსახურებს და გვჯერა, რომ მისი უწმინდესობა ღირსეულად გააგრძელებს ილია II-ის გზას მშვიდობის, სიყვარულის, ტრადიციების დაცვისა და ეროვნული ერთობის განმტკიცებისთვის.

ვულოცავ სრულიად საქართველოს, ქართულ ეკლესიას და თითოეულ მართლმადიდებელს ამ უმნიშვნელოვანეს დღეს. ღმერთმა დალოცოს საქართველოს ეკლესია, მისი ახალი სულიერი წინამძღოლი და ჩვენი ქვეყანა“- წერს დავით კოდუა.

საქართველოს კათოლიკოს - პატრიარქი შიო მესამე მღვდელმთავრებმა 22 ხმით არჩიეს.

მღვდელმთავრებმა არჩევანი სამ კანდიდატს - საპატრიარქო ტახტის მოსაყდრე, მიტროპოლიტ შიოს, მროველ-ურბნელ მიტროპოლიტ იობსა და ფოთისა და ხობის მიტროპოლიტ გრიგოლს შორის გააკეთეს.

„მოგმართავთ ახლად გამორჩეულ კანდიდატს - თანახმა ბრძანდებით დაიდგათ სრულიად საქართველოს კათოლიკოს - პატრიარქის, მთავარეპისკოპოსის, ბიჭვინთისა და ცხუმ - აფხაზეთის მიტროპოლიტის საპატიო უღელი ღვთის სადიდებლად, ეკლესიისა და ქართველი ერის საკეთილდღეოდ?“, - მიმართა მეუფე ანანიამ მეუფე შიოს.

„ჩემს გამორჩევას სრულიად საქართველოს კათოლიკოს-პატრიარქად ვღებულობ მორჩილებით, ღვთის მადლითა და სასოებით!“, - აღნიშნა არჩეულმა პატრიარქმა, რის შემდეგაც მეუფე ანანიამ ახლად არჩეული პატრიარქის საეკლესიო ტიტული წარმოთქვა:

„საქართველოს წმინდა სამოციქულო ავტოკეფალიური მართლმადიდებელი ეკლესიის მეთაურია უწმინდესი და უნეტარესი საქართველოს პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ - აფხაზეთის მიტროპოლიტი, დიდი მეუფე, მამაი ჩვენი შიო მესამე! აქსიოს!“.

კათოლიკოს-პატრიარქად შიო მესამეს არჩევას ულოცავს სამეგრელო-ზემო სვანეთის სახელმწიფო რწმუნებული დავით ვერავა:

„ვულოცავ სრულიად საქართველოს კათოლიკოს-პატრიარქს შიო მესამეს პატრიარქად არჩევას!

დარწმუნებული ვარ, ახალი პატრიარქი მნიშვნელოვან წვლილს შეიტანს ქართული ეკლესიის კიდევ უფრო გაძლიერებასა და რწმენის განმტკიცებაში. ჩვენი ბრძენი პატრიარქის ილია მეორის მიერ მისი მოსაყდრედ დასახელება, სწორედ შიო lll-ის გამორჩეულობას უსვამს ხაზს.

ვუსურვებ ღვთის შეწევნას, გამძლეობას და დღეგრძელობას ჩვენი ეკელსიის ახალ საჭეთმპყრობელს!

სრულიად საქართველოს ვულოცავ კათოლიკოს-პატრიარქის არჩევას! ღმერთი ფარავდეს ღვთისმშობლის წილხვედრ ჩვენს სამშობლოს!“ - წერს დავით ვერავა.

სამების ტაძარში გაფართოებულ საეკლესიო კრებაზე საქართველოს ახალ პატრიარქად მეუფე შიო აირჩიეს. მართლმადიდებელი ეკლესიის გაფართოებული კრება 13:00 საათიდან დახურულ რეჟიმში მიმდინარეობდა.

მღვდელმთავრებმა არჩევანი სამ კანდიდატს - საპატრიარქო ტახტის მოსაყდრე, მიტროპოლიტ შიოს, მროველ-ურბნელ მიტროპოლიტ იობსა და ფოთისა და ხობის მიტროპოლიტ გრიგოლს შორის გააკეთეს. მეუფე შიომ 22 ხმა მიიღო, მეუფე იობმა 9 და მეუფე გრიგოლმა 7 ხმა.

საპატრიარქო ტახტის მოსაყდრე, მიტროპოლიტი შიო - სენაკისა და ჩხოროწყუს მიტროპოლიტი, ერისკაცობაში ელიზბარ მუჯირი, ილია II-ის გადაწყვეტილებით, უკვე 9 წელია, საპატრიარქო ტახტის მოსაყდრეა. ის არის ქორეპისკოპოსი, განსაკუთრებული დამსახურებების გამო სკუფიაზე ბრილიანტის ჯვრის ტარების უფლებით. დამთავრებული აქვს ბათუმის სასულიერო სემინარია და მოსკოვის სასულიერო აკადემია.

ფოთისა და ხობის მიტროპოლიტ გრიგოლი - ერისკაცობაში გურამ ბერბიჭაშვილი, სკოლის დამთავრების შემდეგ ის უკრაინაში სამოქალაქო ავიაციის სასწავლებელში სწავლობდა. 1988-1991 წლებში სწავლა თბილისის სასულიერო სემინარიაში გააგრძელა, შემდეგ კი თბილისის სასულიერო აკადემიაში. 1996 წლის 24 მარტს საქართველოს კათოლიკოს-პატრიარქმა ილია II-მ არქიმანდრიტი გრიგოლი ფოთისა და ხობის ეპისკოპოსად აკურთხა.

მროველ-ურბნელი მიტროპოლიტი იობი აქიაშვილი - ერისკაცობაში ელგუჯა აქიაშვილი, 1960 წელს ყაზბეგის რაიონის სოფელ სნოში დაიბადა. სნოს საშუალო სკოლის დამთავრების შემდეგ ჩაირიცხა საქართველოს სასოფლო-სამეურნეო ინსტიტუტის ეკონომიკის ფაკულტეტზე. სტუდენტობის წლებში იყო სიონის საპატრიარქო ტაძრის სტიქაროსანი. დაამთავრა სასულიერო სემინარია. მისი სასულიერო გზა ინსტიტუტის დამთავრების შემდეგ დაიწყო, როცა საპატრიარქოში ეკონომისტად დაინიშნა.

სამების საკათედრო ტაძარში, გაფართოებულ საეკლესიო კრებაზე დღეს ახალ კათოლიკოსს გამოარჩევენ. კრება 13:00 საათზე დაიწყება. მღვდელმთავრებმა არჩევანი სამ კანდიდატს - საპატრიარქო ტახტის მოსაყდრე, მიტროპოლიტ შიოს, მროველ-ურბნელ მიტროპოლიტ იობსა და ფოთისა და ხობის მიტროპოლიტ გრიგოლს შორის უნდა გააკეთონ.

სანამ ეპისკოპოსები არჩევანს გააკეთებენ, პატრიარქობის კანდიდატებს და დელეგატების ნაწილს თავისი მოსაზრების გამოთქმის შესაძლებლობა ექნება. ამის შემდეგ ჩატარდება კენჭისყრა. თუ პატრიარქობის კანდიდატი 39 ეპისკოპოსისგან მინიმუმ 20 ხმას დააგროვებს, გამარჯვებულად ჩაითვლება. ხმების სხვაგვარი გადანაწილების შემთხვევაში, ხელახალი კენჭისყრა ჩატარდება. პატრიარქის არჩევის პროცესს ეპარქიებიდან, სასულიერო აკადემიებიდან და სემინარიებიდან მოწვეული 1200 დელეგატი დაესწრება. კენჭისყრის შედეგები დღესვე გამოცხადდება. შესაბამისად, საქართველოს ეკლესიას დღეიდან ახალი კათოლიკოს-პატრიარქი ეყოლება. მისი ინტრონიზაციის თარიღთან დაკავშირებით კი გადაწყვეტილება უკვე თავად გამორჩეულმა პატრიარქმა უნდა მიიღოს.

საქართველოს განათლების, მეცნიერებისა და ახალგაზრდობის მინისტრი გივი მიქანაძე აბაშის მუნიციპალიტეტის საჯარო სკოლების მოსწავლეთა მშობლებს შეხვდა და მათ ზოგადი და უმაღლესი განათლების საფეხურზე მიმდინარე რეფორების ძირითადი მიმართულებები გააცნო.

მშობლებთან გამართულ შეხვედრას სახელმწიფო რწმუნებული სამეგრელო-ზემო სვანეთის მხარეში დავით ვერავა, წალენჯიხის, ჩხოროწყუს, მარტვილისა და აბაშის მუნიციპალიტეტების დელეგატი ილია ინჯია, აბაშის მუნიციპალიტეტის მერი გიგა გაბელაია, აბაშის მუნიციპალიტეტის საკრებულოს თავმჯდომარე იასონ კიზირია და სხვა მოწვეული სტუმრები ესწრებოდნენ.

მინისტრმა, რეფორმების ეფექტიანად განხორციელების კუთხით, განსაკუთრებული ყურადღება გაამახვილა სასკოლო ცხოვრებაში მშობელთა აქტიურ ჩართულობაზე.

შეხვედრის ფარგლებში გივი მიქანაძემ განათლების სისტემაში განსახორციელებელი ინიციატივები განიხილა. საუბარი შეეხო სასწავლო რესურსების ხარისხის გაუმჯობესებას, სასკოლო ფორმას, პირველკლასელთა რეგისტრაციისა და ეროვნული გამოცდებისთვის რეგისტრაციის პროცედურებს და სახელმწიფო უნივერსიტეტებში უფასოდ სწავლის შესაძლებლობებს.

შეხვედრაზე მშობლებმა მინისტრს მათთვის მნიშვნელოვან თემებზე კითხვები დაუსვეს და ამომწურავი განმარტებები მიიღეს.

ზუგდიდის მუნიციპალიტეტის მერიის სოციალური პროგრამებით აპრილის თვეში 1382-მა მოქალაქემ ისარგებლა, რისთვისაც 198 291 ლარი გამოიყო. ინფორმაციას ზუგდიდის მერია ავრცელებს.

სოციალურად დაუცველი მოსახლეობის კვებით უზრუნველყოფის პროგრამით ისარგებლა 299 ბენეფიციარმა.

ომის ვეტერანთა სოციალური დაცვის პროგრამით ისარგებლა 1 ბენეფიციარმა.

ქალისა და მამაკაცის თანასწორობისა და ოჯახებისა და ბავშვების სოციალური დაცვის პროგრამით ისარგებლა 11 ბენეფიციარმა.

შეზღუდული შესაძლებლობის მქონე პირთა სოციალური დაცვის პროგრამით ისარგებლა 68 მოქალაქემ.

მარტოხელა მშობლის სოციალური დაცვის პროგრამით ისარგებლა 79 ბენეფიციარმა.

ხანდაზმულთა, მარტოხელა მოხუცების შინმოვლისა და სოციალურად დაუცველი გარდაცვლილი ბენეფიციარების ოჯახების მხარდაჭერის პროგრამით სარგებლა 2 ოჯახმა.

სადღესასწაულო დღეების დახმარების პროგრამაშით ისარგებლა 550 ოჯახმა.

ტრანსპორტით შეღავათიანი მგზავრობის თანადაფინანსების პროგრამით ისარგებლა 90 ბენეფიციარმა.

სხვადასხვა მიზეზით უსახლკაროდ დარჩენილთა და დაზარალებულთა ხელშეწყობის პროგრამით ისარგებლა 115 მოქალაქემ.

დევნილთა მხარდაჭერის პროგრამით ისარგებლა 23 ბენეფიციარმა.

სოციალურად დაუცველი ოჯახების გათბობის საშუალებებით უზრუნველყოფის და სოციალური საფრთხის წინაშე მყოფი ოჯახების ფინანსური დახმარების პროგრამით ისარგებლა 130 ბენეფიციარმა.

პროგრამით ,,სოციალური საცხოვრისი კეთილმოწყობილ გარემოში“ – ისარგებლა 14 მობინადრემ.

სინოდის წევრებმა პატრიარქობის სამი კანდიდატი აირჩიეს. როგორც სინოდის სხდომის დასრულების შემდეგ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ ჟურნალისტებს განუცხადა, ეს კანდიდატები არიან - საპატრიარქო ტახტის მოსაყდრე, სენაკისა და ჩხოროწყუს მიტროპოლიტი მეუფე შიო, მროველ-ურბნელი მიტროპოლიტი, მეუფე იობი და ფოთისა და ხობის მიტროპოლიტი მეუფე გრიგოლი.

ჯაღმაიძის ინფორმაციით, 20 ხმა მიიღო მეუფე შიომ, დანარჩენმა კანდიდატებმა კი - 7-7 ხმა.

გაფართოებულ კრებაზე, რომელიც 17 მაისამდე დაინიშნება, სწორედ დღეს არჩეული კანდიდატებიდან სინოდი საქართველოს 142-ე პატრიარქს გამოავლენს. თუ გაფართოებულ კრებაზე კანდიდატებიდან ვერც ერთი ვერ მოიპოვებს ხმათა უმრავლესობას, გაიმართება მეორე ტური, რომელშიც მონაწილეობას ხმათა უმრავლესობის მქონე ორი კანდიდატი მიიღებს.

ანდრია ჯაღმაიძის განმარტებით, კრიტერიუმების თანახმად პატრიარქი უნდა იყოს ქართველი, უნდა იყოს ბერი, სინოდის წევრი, უნდა ჰქონდეს განათლება, შესრულებული უნდა ჰქონდეს 40 წელი და იყოს არაუმეტეს 70 წლის.

ზუგდიდის მუნიციპალიტეტის მერიის მხარდაჭერით, დიაგნოსტიკურ ცენტრ „ჯან-მედში“ სოციალურად დაუცველი ბავშვებისთვის უფასო სამედიცინო აქცია გაიმართა.

პატარებს პედიატრი ნუგზარ უბერი უწევდა კონსულტაციას.

ნუგზარ უბერი თბილისის სახელმწიფო სამედიცინო უნივერსიტეტის პროფესორ ემერიტუსი, ასევე თბილისის და ზუგდიდის საპატიო მოქალაქეა.

აქციის მიმდინარეობას ზუგდიდის მუნიციპალიტეტის მერი დავით კოდუა სოციალური და ჯანდაცვის სამსახურის წარმომადგენლებთან ერთად გაეცნო.

მერის განცხადებით, მსგავსი უფასო სამედიცინო აქციები მნიშვნელოვანი მხარდაჭერაა მოსახლეობისთვის.

„მადლობა ნუგზარ უბერს, დიდი გამოცდილების მქონე ექიმს და ჩვენი ქალაქის ღირსეულ შვილს — აღნიშნულ საქმეში მონაწილეობისთვის“, — აღნიშნა მერმა.

აქციის ფარგლებში პაციენტებს „ავერსისგან" უფასო მედიკამენტები გადაეცათ.

სურსათის ეროვნული სააგენტოს აჭარის დეპარტამენტის ინსპექტორებმა არაგეგმური სახელმწიფო კონტროლის ფარგლებში არალეგალური საკონსერვო საწარმო (საწებლებისა და აჯიკის წარმოება) - შპს „ნთკ 2016“ (მის: ქ. ბათუმი, ქიქავას 13) გამოავლინეს. ობიექტზე დაფიქსირდა კრიტიკული და არაკრიტიკული შეუსაბამობები, მათ შორის, დარღვეული იყო ჰიგიენური ნორმები.

აღნიშნული დარღვევების გამო, ბიზნესოპერატორი დაჯარიმდა საქართველოს კანონმდებლობის შესაბამისად და, კრიტიკული შეუსაბამობების სრულად აღმოფხვრამდე, საწარმოო პროცესი შეუჩერდა. დაილუქა ასევე 41 ბიდონი პომიდვრის სოუსი და 560 ქილა აჯიკა.

სურსათის ეროვნული სააგენტო მოუწოდებს ბიზნესოპერატორებს, საქმიანობა განახორციელონ მხოლოდ კანონმდებლობით დადგენილი მოთხოვნების დაცვით.

ინფორმაციას სურსათის ეროვნული სააგენტო ავრცელებს.