სენაკში, წყალდიდობით გამოწვეული პრობლემების აღმოსაფხვრელად, სტიქიის პირველივე წუთებიდან ყველა შესაბამისი მუნიციპალური სამსახური მობილიზებულია და საგანგებო რეჟიმში მუშაობს. პრობლემურ ადგილებში მუშაობენ საგანგებო სიტუაციების მართვის სამსახურის ბრიგადები. ინფორმაციას სენაკის მერია ავრცელებს.

უხვმა ნალექმა და წყალმოვარდნებმა პრობლემები შექმნა სენაკის მუნიციპალიტეტში.

ძლიერი წვიმებისგან წარმოქმნილმა წყალდიდობამ დააზარალა მოსახლეობის ნაწილი, დააზიანა მუნიციპალური ინფრასტრუქტურა.

დაიტბორა ქუჩები, წყალმა რამენიმე ქუჩაზე საცხოვრებელი სახლების პირველი სართულები და ეზოები დატბორა. ასევე დაიტბორა სახნავ-სათესი ფართობები. დაზიანდა ადმინისტრაციული ერთეულების შიდა გრუნტოვანი გზები, ხიდების ნაწილი.

სენაკის მერიაში შემოსულ შეტყობინებებზე მყისიერი რეაგირება ხდება.

პრობლემურ ადგილებზე იმყოფებიან ადგილობრივი თვითმმართველობის წარმომადგენლები.

შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის თანამშრომლებმა, განსაკუთრებით დიდი ოდენობით ნარკოტიკული საშუალებების ჯგუფურად, უკანონო შეძენა-შენახვისა და უკანონო რეალიზაციის ხელშეწყობის ბრალდებით უკრაინის რესპუბლიკის ორი მოქალაქე დააკავეს. ინფორმაციას შს სამინისტრო ავრცელებს.

სამართალდამცველებმა ზუგდიდში, ბრალდებულების პირადი და დროებითი საცხოვრებელი ბინის ჩხრეკის შედეგად ნივთმტკიცებად ამოიღეს სარეალიზაციოდ გამზადებული განსაკუთრებით დიდ ოდენობით - 625 შეკვრად დაფასოებული ნარკოტიკული საშუალება „მეთადონი“.

გამოძიება სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

ხობის მუნიციპალიტეტის ნოჯიხევის ადმინისტრაციულ ერთეულში გზის რეაბილიტაციის პროექტი ხორციელდება.

ნოჯიხევში მიმდინარე სარეაბილიტაციო სამუშაოებს ხობის მუნიციპალიტეტის მერი, დავით ბუკია და მერიის ინფრასტრუქტურის, ურბანული განვითარებისა და არქიტექტურის სამსახურის უფროსი, გიორგი იოსავა გაეცნენ.

პროექტის ფარგლებში იგება ბეტონის საფარი, განხორციელდება გზის სავალი ნაწილის ჰორიზონტალური მონიშვნა, დამონტაჟდება საგზაო ნიშნები, მოეწყობა ბეტონის სანიაღვრე არხები და ეზოებთან მისასვლელები.

ინფრასტრუქტურულ პროექტს, რომლის სახელშეკრულებო ღირებულებაც 1 250 899 ლარს შეადგენს, საქართველოს რეგიონებში განსახორციელებელი პროექტების ფონდისა და ადგილობრივი ბიუჯეტის თანადაფინანსებით ხორციელდება.

ნოჯიხევში გზის საფარი ამორტიზებული იყო და სრულ რეაბილიტაციას საჭიროებდა. სოფელში სამუშაოები აქტიურად მიმდინარეობს და პროექტის განხორციელების შედეგად მოსახლეობა კეთილმოწყობილი საგზაო ინფრასტრუქტურით ისარგებლებს.

ქალაქ ხობში, ექვთიმე თაყაიშვილის ქუჩაზე და თორსა-დღვაბის ადმინისტრაციულ ერთეულში ხელოვნურსაფარიანი მოედნების მშენებლობა მიმდინარეობს.

პროექტის ფარგლებში მოეწყობა ღობე, სკამები, განათების სისტემა და დაიგება ხელოვნური საფარი.

პროექტებს ადგილობრივი ბიუჯეტის დაფინანსებით ხობის მუნიციპალიტეტის მერია ახორციელებს. სამუშაოების ჯამური სახელშეკრულებო ღირებულება 350 000 ლარზე მეტია.

ხობის მუნიციპალიტეტში სპორტული ინფრასტრუქტურის განახლების პროგრამის ფარგლებში 26 მინი სპორტული მოედნის მშენებლობა-რეაბილიტაცია განხორციელდა.

სენაკის მუნიციპალიტეტის მასშტაბით, სტიქიის შედეგად დაზიანებული ინფრასტრუქტურის აღდგენის მიზნით, სარეაბილიტაციო სამუშაოები ხორციელდება.

მიმდინარე სამუშაოები ადგილზე დაათვალიერეს სენაკის მუნიციპალიტეტის მერმა, ვახტანგ გადელიამ, მერის პირველმა მოადგილემ, ბადრი ქუთელიამ და საკრებულოს სივრცითი-ტერიტორიული დაგეგმარებისა და ინფრასტრუქტურის კომისიის თავმჯდომარემ, გიორგი შომახიამ.

იუსტიციის სახლის მიმდებარედ, ღელე ხაბაზეთზე მიმდინარეობს სტიქიის შედეგად დაზიანებული ბეტონის ჯებირების აღდგენის სამუშაოები. პროექტის ღირებულება 25 539 ლარს შეადგენს.

მიმდინარე სამუშაოების დასრულება აგვისტოს თვის ბოლოს იგეგმება.

ფოთი ევროპის და აფრიკის საუკეთესო წყალსათხილამურო სპორტსმენებს უმასპინძლებს.

24-26 ივლისს „ოქროს ტბის“ წყალსათხილამურო ბაზაზე 2026 წლის ევროპისა და აფრიკის ღია ჩემპიონატი გაიმართება, რომელშიც 20 ქვეყნიდან 120 სპორტსმენი მიიღებს მონაწილეობას.

ჩემპიონატი სამ დისციპლინაში ჩატარდება: სლალომი, ფიგურები და ტრამპლინზე ხტომა.

ღონისძიებისთვის მზადება აქტიურ ფაზაშია. „ოქროს ტბის“ ბაზაზე მიმდინარეობს ინფრასტრუქტურის განახლება - ეწყობა მაყურებელთა სტანდარტული და VIP ზონები, დამონტაჟდა ახალი ტრამპლინი, სანაპირო ზოლზე დასრულდა ძველი ნაგებობების დემონტაჟი და მოეწყო ტალღების საწინააღმდეგო ქვის კონსტრუქციები.

„მადლობას ვუხდი საქართველოს სპორტის სამინისტროსა და ცენტრალურ ხელისუფლებას მხარდაჭერისთვის.

ეს ღონისძიება მნიშვნელოვანია არა მხოლოდ სპორტის განვითარებისთვის, არამედ ჩვენი ქალაქის საერთაშორისო ცნობადობის, ტურიზმისა და ეკონომიკური აქტივობის ზრდისთვის. განსაკუთრებით სასიხარულოა, რომ ჩემპიონატი ტარდება „ოქროს ტბაზე“ - უნიკალურ სპორტულ სივრცეში, რომელსაც ამ სპორტის განვითარების მდიდარი ისტორია აქვს.

ჩვენი მიზანია, რომ ფოთი არა მხოლოდ ამ ჩემპიონატის წარმატებული მასპინძელი, არამედ წყლის სპორტის ერთ-ერთი აღიარებული საერთაშორისო ცენტრი გახდეს" -განაცხადა ფოთის მერის მერმა ბექა ვაჭარაძემ.

ჩემპიონატის მოსამზადებელ სამუშაოებს ფოთის მერი ბექა ვაჭარაძე სპორტის მინისტრის პირველ მოადგილესთან, ირაკლი მეძმარიაშვილთან, საქართველოს პარლამენტის წევრ გიორგი ხახუბიასა და ფოთის ტბის კლუბის ხელმძღვანელ ქეთი კუბლაშვილთან ერთად გაეცნო.

სასტუმო ,,ანაკლიის“ მენეჯმეტი ოპოზიციურ მედიას არასწორი ინფორმაციის გავრცელებაში ადანაშაულებს. გავრცელებული ინფორმაცია, რომ სასტუმრო რუსული წარმოშობის მოქალაქემ იყიდა, სასტუმროს მენეჯმენტი უარყოფს და აცახდებს, რომ ,,Holtel Aanaklia“-ს ახალი მფლობელი, არა რუსული წარმომავლობის ბიზნესმენი, არამედ სოხუმში დაბადებული, ამჯამად გერმანიის მოქალაქე ალექსანდრე პოტიომკინია.

„ბოლო დღეებში გავრცელებულმა ცალკეულმა შეფასებებმა და ინტერპრეტაციებმა გვაფიქრებინა, საზოგადოებისთვის დამატებითი ინფორმაცია მიგვეწოდებინა სასტუმრო „ანაკლია“-ს პროექტისა და მისი ინვესტორის, ბატონი ალექსანდერ პოტემკინის შესახებ.

ალექსანდერ პოტემკინი არის გერმანიის მოქალაქე, სოხუმში დაბადებული მეცნიერი ეკონომიკის დარგში და ინვესტორი, რომელიც საქართველოში ბიზნესსაქმიანობას 2009 წლიდან ახორციელებს. ამ წლების განმავლობაში მის მიერ დაფუძნებულ და მხარდაჭერილ კომპანიებში დასაქმებული იყო და დღესაც დასაქმებულია ასობით საქართველოს მოქალაქე. მისი საქმიანობა დაკავშირებულია სოფლის მეურნეობის (მეფუტკრეობა და ფუტკრის პროდუქტების წარმოება; ორგანული სასუქი ბიოჰუმუსის წარმოება; ბიო მოცვის წარმოება და ა.შ), მეცნიერების, ტურიზმისა და რეგიონული განვითარების მიმართულებებთან.

სასტუმრო „ანაკლია“-ს განახლება განხორციელდა კერძო ინვესტიციის (გერმანული ინვესტიციის) საფუძველზე. პროექტი არ წარმოადგენს სახელმწიფო პროგრამის ნაწილს, არ დაფინანსებულა სახელმწიფო ბიუჯეტიდან და არ სარგებლობს რაიმე განსაკუთრებული სახელმწიფო პრივილეგიით. ეს არის კერძო ინვესტორის მიერ საკუთარი ფინანსური რესურსებით განხორციელებული პროექტი, რომლის მიზანია ანაკლიის ტურისტული პოტენციალის განვითარება, ახალი შესაძლებლობების შექმნა და ადგილობრივი მოსახლეობის დასაქმების ხელშეწყობა.

აღსანიშნავია კიდევ ერთი მნიშვნელოვანი გარემოება, რომელიც კარგად ასახავს ბატონი ალექსანდერ პოტემკინის მრავალწლოვან კავშირს საქართველოსთან. ჯერ კიდევ 1980-იანი წლების მეორე ნახევარში , გორბაჩოვის მოსვლის შემდეგ, იგი მონაწილეობდა დასავლური კულტურული და ეკონომიკური ინიციატივების საბჭოთა სივრცეში შემოტანაში. ის არის ჟურნალ „Burda Moden“-ის მოსკოვის რედაქციის დაარსების ავტორი.

1986 წელს, როდესაც საქართველოსთვის ახალი სასოფლო-სამეურნეო კულტურების დანერგვის საკითხი აქტიურად განიხილებოდა, საქართველოს სსრ მინისტრთა საბჭოს თავმჯდომარის, ოთარ ჩერქეზიას ინიციატივით, ბონში მდებარე საბჭოთა საელჩოს მეშვეობით დაიწყო იმ პირის მოძიება, რომელიც საქართველოს კივის ნერგების შემოტანაში დაეხმარებოდა. სწორედ ამ პროცესში იქნა რეკომენდებული ალექსანდერ პოტემკინი — საქართველოში დაბადებული და გაზრდილი ეთნიკური გერმანელი, რომელსაც კარგად ესმოდა როგორც საქართველოს ინტერესები, ისე დასავლეთ ევროპასთან თანამშრომლობის შესაძლებლობები.

მისი პირადი ფინანსური რესურსებით შეძენილ იქნა 30 000 კივის ნერგი, რომლებიც საქართველოში ჩამოიტანეს როგორც საჩუქარი ა. პოტემკინისგან და რომელთა საფუძველზეც დაიწყო კივის კულტურის ფართომასშტაბიანი გავრცელება ქვეყანაში. სწორედ ამ ისტორიულ პროცესს უკავშირდება საქართველოში კივის მეურნეობის ჩამოყალიბების ერთ-ერთი მნიშვნელოვანი ეტაპი.

აღსანიშნავია, რომ საერთაშორისო ბიზნესსაქმიანობის ფარგლებში ბატონ ალექსანდერ პოტემკინს სხვადასხვა პერიოდში შექმნილი და წარმატებით ფუნქციონირებადი ჰქონდა დაახლოებით 60 Duty Free-ის მაღაზია, რომლებიც განთავსებული იყო ყოფილი საბჭოთა კავშირის რესპუბლიკების სასაზღვრო-გამშვებ პუნქტებზე. აღნიშნული საქმიანობა კიდევ ერთხელ ადასტურებს მის მრავალწლიან გამოცდილებას, ფართო საერთაშორისო კავშირებსა და მსხვილი საინვესტიციო პროექტების განხორციელების შესაძლებლობას.

ამასთან, მისი ფინანსური მონაწილეობითა და სპონსორობით, 1,5 მილიონი აშშ დოლარის ოდენობით, განხორციელდა სარფის სასაზღვრო-გამშვები პუნქტის მშენებლობის პროექტი, რომელიც დღემდე საქართველოს ერთ-ერთ უმნიშვნელოვანეს სატრანსპორტო და ეკონომიკურ კარიბჭეს წარმოადგენს.

განსაკუთრებით სამწუხაროა, როდესაც მეგრული ენის, კულტურისა და ისტორიის მიმართ გამოხატული პატივისცემა პოლიტიკურ კონტექსტში განიხილება. მის მიერ გამოცემული ორტომეული „მეგრული ენა“ წარმოადგენს სამეცნიერო და კულტურულ ნაშრომს, რომლის მიზანია საქართველოს ერთ-ერთი უნიკალური კულტურული მემკვიდრეობის შენარჩუნება და განვითარება.

სამეგრელოსთან მისი დამოკიდებულება არ არის ფორმალური ან შემთხვევითი. იგი სოხუმში დაიბადა და გაიზარდა, ბავშვობიდანვე ახლო ურთიერთობა აკავშირებს საქართველოსთან და მის ულამაზეს კუთხეებთან. ანაკლიას კი ხშირად მოიხსენიებს როგორც „შავი ზღვის მარგალიტს“ — ადგილს, რომელსაც გააჩნია განვითარების, ტურიზმისა და ეკონომიკური ზრდის უნიკალური პოტენციალი. ეს არის რწმენა იმისა, რომ რუსეთის მიერ ოკუპირებული აფხაზეთის მოსაზღვრე ანაკლიის ეკონომიკური გაძლიერება და ტურისტული აღმავლობა უმნიშვნელოვანესი ნაბიჯია ოკუპაციის პრობლემის გრძელვადიანი, მშვიდობიანი მოგვარებისკენ, რაც ახალ შესაძლებლობებს გააჩენს საოკუპაციო ხაზის ორივე მხარეს.

მისთვის ანაკლიის განვითარება მხოლოდ ბიზნესინტერესი არ არის. ეს არის რწმენა იმისა, რომ რუსეთის მიერ ოკუპირებული აფხაზეთის მოსაზღვრე ანაკლიის ეკონომიკური გაძლიერება, ტურისტული განვითარება და საერთაშორისო ცნობადობის ზრდა მნიშვნელოვანი წინაპირობაა რეგიონის მშვიდობიანი და მდგრადი განვითარებისათვის, რაც მომავალში ახალ შესაძლებლობებს შექმნის როგორც ადგილობრივი მოსახლეობისთვის, ისე მთლიანად ქვეყნისთვის.

ასევე გვსურს განვმარტოთ, რომ სასტუმროს გახსნის ღონისძიებაზე ადგილობრივი თვითმმართველობისა და სახელმწიფო რწმუნებულის ადმინისტრაციის წარმომადგენელთა მოწვევა წარმოადგენდა ცივილიზებულ და ევროპულ პრაქტიკას, რომელიც მიმართულია ბიზნესსა და ადგილობრივ საზოგადოებას შორის თანამშრომლობის, ურთიერთპატივისცემისა და კეთილგანწყობის გამოხატვისკენ. გახსნის ცერემონიაზე ლენტის გაჭრაში მათი მონაწილეობა იყო სიმბოლური ჟესტი და არ შეიძლება განხილულ იქნეს როგორც რომელიმე პოლიტიკური ძალის, სახელმწიფო პროგრამის ან განსაკუთრებული მხარდაჭერის გამოვლინება.

სასტუმრო „ანაკლია“ არის კერძო- გერმანული ინვესტიციის შედეგად განხორციელებული პროექტი, რომელიც შეიქმნა კერძო კაპიტალით, კერძო რისკითა და კერძო პასუხისმგებლობით.

ვფიქრობთ, რომ სამართლიანი შეფასების საფუძველი უნდა იყოს ადამიანის საქმიანობა, განხორციელებული ინვესტიციები, შექმნილი სამუშაო ადგილები, გადახდილი გადასახადები და ქვეყნის განვითარებაში შეტანილი რეალური წვლილი. განსაკუთრებით მაშინ, როდესაც საუბარია ადამიანზე, რომელმაც ათწლეულების განმავლობაში საკუთარი რესურსებით განახორციელა არაერთი პროექტი საქართველოში და დღესაც აგრძელებს ინვესტირებას ქვეყნისა და მისი რეგიონების განვითარებაში.

ჩვენთვის ანაკლია მხოლოდ ბიზნესპროექტი არ არის. ეს არის რწმენა, რომ საქართველოს შავი ზღვის სანაპიროს, სამეგრელოსა და მთლიანად ქვეყანას აქვს განვითარების დიდი პოტენციალი. სწორედ ამ რწმენით განხორციელდა სასტუმრო „ანაკლია“-ს განახლება და სწორედ ამავე რწმენით გაგრძელდება მისი განვითარება მომავალშიც“ - ნათქვამია გვრცელებულ ინფორმაციაში.

მარტვილში ტურისტული ცენტრი აშენდება. ქალაქ მარტვილში ტურისტული ცენტრის პროექტირება უკვე დასრულებულია, რაც მუნიციპალიტეტის განვითარების ახალ ეტაპს ჩაუყრის საფუძველს.

პროექტის ფარგლებში აშენდება სრულიად ახალი, თანამედროვე შენობა, რომელიც მუნიციპალიტეტისთვის სტრატეგიული მნიშვნელობის იქნება. ტურისტული ცენტრი მნიშვნელოვნად შეუწყობს ხელს მარტვილში ტურიზმის პოტენციალის ზრდას, ვიზიტორთა სწორ ინფორმირებულობას, მომსახურების ხარისხის ამაღლებასა და ადგილობრივი ტურისტული მარშრუტების პოპულარიზაციას.

ობიექტი სრულად უპასუხებს თანამედროვე სტანდარტებს, იქნება კომფორტული, მოწესრიგებული და ადაპტირებული.

სამშენებლო და სარეაბილიტაციო სამუშაოების შესყიდვის მიზნით, ტენდერი უახლოეს მომავალში გამოცხადდება.

მარტვილის მუნიციპალიტეტის სოფელ თამაკონის საბავშვო ბაღის მშენებლობა მიმდინარეობს.

სამეგრელო-ზემო სვანეთის სახელმწიფო რწმუნებულმა დავით ვერავამ, ინფრასტრუქტურის სამინისტროს მუნიციპალური განვითარების ფონდის აღმასრულებელმა დირექტორმა გიორგი შონიამ, მარტვილის მერმა გიორგი ნაჭყებიამ და საკრებულოს თავმჯდომარე ელდარ თოდუამ სოფელ თამაკონში 50 აღსაზრდელზე გათვლილი საბავშვო ბაღის მიმდინარე სამშენებლო სამუშაოები დაათვალიერეს.

ბაღში, ბავშვებისთვის, თანამედროვე სტანდარტების შესაბამისად მოეწყობა საგანმანათლებლო, საძინებელი და სათამაშო ოთახები, ასევე სამზარეულო, სასადილო და სველი წერტილები. ეზოში გათვალისწინებული იქნება რეკრეაციული სივრცე და საბავშვო სათამაშო მოედნები.

ჩხოროწყუს მუნიციპალიტეტის სოფელ კირცხის №2 საჯარო სკოლა შენდება.

120 მოსწავლეზე გათვლილი თანამედროვე სტანდარტების შესაბამისი საგანმანათლებლო დაწესებულება სრულად იქნება მორგებული მოსწავლეთა საჭიროებებზე.

პროექტის მიმდინარეობას სამეგრელო-ზემო სვანეთის სახელმწიფო რწმუნებული დავით ვერავა, ინფრასტრუქტურის სამინისტროს მუნიციპალური განვითარების ფონდის აღმასრულებელი დირექტორი გიორგი შონია, ჩხოროწყუს მერი ჯუმბერ იზორია და საკრებულოს თავმჯდომარე ჯანო პერტაია გაეცნენ.

პროექტის ფარგლებში მოეწყობა თანამედროვე საკლასო ოთახები, ლაბორატორია, საინფორმაციო ტექნოლოგიების კაბინეტი და ბიბლიოთეკა. სკოლა აღიჭურვება თანამედროვე ტექნოლოგიებით და მოსწავლეებისთვის შეიქმნება უსაფრთხო, კომფორტული და განვითარებაზე ორიენტირებული სასწავლო გარემო.

რუხის რესპუბლიკურ საავადმყოფოში ჯანდაცვის სამინისტროს ორგანიზებით მასშტაბური უფასო სამედიცინო აქცია გაიმართა, რომლის მიზანიც მოსახლეობაში პრევენციული მედიცინის პოპულარიზაცია, დაავადებების ადრეული გამოვლენა და ხარისხიან სამედიცინო მომსახურებაზე ხელმისაწვდომობის გაზრდაა. ღონისძიებაში აქტიურად იყო ჩართული ზუგდიდის საზოგადოებრივი ჯანდაცვის ცენტრი.

სამედიცინო აქციას ჯანდაცვის მინისტრი მიხეილ სარჯველაძე, შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი და სამეგრელო-ზემო სვანეთის სახელმწიფო რწმუნებული დავით ვერავა დაესწრნენ.

აქციის ფარგლებში მოქალაქეებს შესაძლებლობა ჰქონდათ, რომ უფასოდ ჩაეტარებინათ სკრინინგული კვლევები ძუძუს, საშვილოსნოს ყელის, სწორი ნაწლავისა და პროსტატის კიბოს, ასევე B და C ჰეპატიტებისა და ჰიპერტენზიის მიმართულებით. პარალელურად, რუხის რესპუბლიკური საავადმყოფოს სპეციალისტებმა ზრდასრულ პაციენტებს კარდიოლოგის, ნეიროქირურგისა და გინეკოლოგის უფასო კონსულტაციები გაუწიეს, ასევე ჩატარდა სხვადასხვა დიაგნოსტიკური კვლევა.

განსაკუთრებული ყურადღება დაეთმო ბავშვთა ჯანმრთელობას – აფხაზეთის ავტონომიური რესპუბლიკის მთავრობის ჩართულობით, აფხაზეთიდან დევნილ ბავშვებს პედიატრიული კონსულტაციები და საჭირო სამედიცინო კვლევები უფასოდ ჩაუტარდათ.

ღონისძიებაში ასევე მონაწილეობდნენ: დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ირაკლი ფურცელაძე, ზუგდიდის მერის მოადგილე ბესიკ ჭეჟია, რუხის რესპუბლიკური საავადმყოფოს დირექტორი სერგო ფიფია და სამედიცინო სფეროს წარმომადგენლები.

ჩხოროწყუს მუნიციპალიტეტის მერმა ჯუმბერ იზორიამ, სოფლის განვითარების სააგენტოს ჩხოროწყუს საინფორმაციო-საკონსულტაციო ცენტრის უფროს დავით გახარიასთან ერთად, სოფელ ზუმსა და ლესიჭინეში ლურჯი მოცვის პლანტაციები დაათვალიერა.

სოფელ ზუმში გოგი თოლორდავას მოცვის პლანტაცია 6 ჰექტარზეა გაშენებული. აქ ყოველდღიურად დაახლოებით ტონანახევარი მოსავალი იკრიფება. როგორც პლანტაციის მესაკუთრე აღნიშნავს, ბაღი მეოთხე წელია ფუნქციონირებს და მიმდინარე სეზონზე 10 ტონამდე მოსავალს ელოდებიან. პროექტი სახელმწიფო პროგრამის – „დანერგე მომავალი“ ფარგლებში, 90 000 ლარამდე თანხით დაფინანსდა.

სოფელ ლესიჭინეში ლუკა ჯაჯანიძის „იბერიის მოცვის ბაღები“ 2022 წლიდან ვითარდება და დღეს უკვე 45 ჰექტარს მოიცავს. პროექტი გარემოს დაცვისა და სოფლის მეურნეობის სამინისტროს პროგრამა – „დანერგე მომავალის” ფარგლებში 675 000 ლარით დაფინანსდა. ასევე ისარგებლა „შეღავათიანი აგროკრედიტით.“ აქ დღეში 15 ტონამდე მოსავალს იღებენ.

პლანტაციების დათვალიერების შემდეგ მერი აქ დასაქმებულ ადგილობრივ მცხოვრებლებს შეხვდა. პლანტაციები უახლესი ტექნოლოგიების გამოყენებით ეწყობა, ამ ეტაპზე სამუშაოზე სოფელ ზუმში 80, ხოლო ლესიჭინეში დასაქმებულია 200 -მდე ადგილობრივი.მათი რიცხვი მასიური კრეფის დროს მნიშვნელოვნად გაიზრდება.

„მოხარული ვარ, რომ დღეს ადგილზე გავეცანით მოცვის მოსავლის აღების პროცესს და ვიხილეთ წარმატებული აგროპროექტები, რომლებიც ჩვენი მუნიციპალიტეტის ეკონომიკურ განვითარებაში მნიშვნელოვან როლს ასრულებს. განსაკუთრებით მნიშვნელოვანია, რომ ასეთი ინიციატივები ქმნის ახალ სამუშაო ადგილებს, აძლიერებს სოფლის მეურნეობის სექტორს და ზრდის ადგილობრივი მოსახლეობის შემოსავლებს. სახელმწიფოს მხარდაჭერით განხორციელებული პროექტები ნათლად აჩვენებს, რომ ჩხოროწყუს აქვს მნიშვნელოვანი პოტენციალი თანამედროვე და კონკურენტუნარიანი აგრობიზნესის განვითარებისათვის. ჩვენ მომავალშიც აქტიურად დავუჭერთ მხარს ფერმერებსა და მეწარმეებს, რათა კიდევ უფრო მეტი წარმატებული პროექტი განხორციელდეს და ჩვენი მუნიციპალიტეტი ეკონომიკურად კიდევ უფრო გაძლიერდეს.“ - აღნიშნა ჯუმბერ იზორიამ.

ამ ეტაპზე ჩხოროწყუს მუნიციპალიტეტში ლურჯი მოცვის პლანტაციები ჯამში 108 ჰექტარ ფართობზეა გაშენებული.

მარტვილის მუნიციპალიტეტის მერმა გიორგი ნაჭყებიამ და საკრებულოს თავმჯდომარემ ელდარ თოდუამ სალხინოს ადმინისტრაციულ ერთეულში მცხოვრებ მიხეილ მებონიას 100 წლის იუბილე მიულოცეს.

მიხეილ მებონია 1926 წელს დაიბადა, მას 3 შვილი, 6 შვილიშვილი, 6 შვილთაშვილი და 1 შვილთაშვილის შვილი ჰყავს.

„ბატონი მიხეილი არის მაგალითი იმისა, თუ როგორ უნდა იცხოვრო ღირსეულად, სიყვარულითა და შრომით. ვამაყობთ, რომ ჩვენს გვერდით ცხოვრობენ ადამიანები, რომლებმაც მთელი საუკუნის ისტორია გამოიარეს. ვუსურვებ მას ჯანმრთელობას, მხნეობას და კიდევ მრავალ წელს საკუთარი ოჯახის გარემოცვაში ბედნიერად ყოფნას“ - აღნიშნა გიორგი ნაჭყებიამ.

მარტვილის მუნიციპალიტეტის მერია შესაბამისი პროგრამის ფარგლებში იუბილარს 3 000 ლარს გადაურიცხავს.

ინფრასტრუქტურის სამინისტროს მუნიციპალური განვითარების ფონდი ზუგდიდის მუნიციპალიტეტში საგანმანათლებლო ინფრასტრუქტურის გაუმჯობესების მიზნით ნაწულუკუს სკოლის მშენებლობასა და სოფელ ჭითაწყარის საჯარო სკოლის რეაბილიტაციას ახორციელებს.

მიმდინარე სამუშაოები ადგილზე დაათვალიერეს სამეგრელო-ზემო სვანეთის სახელმწიფო რწმუნებულმა დავით ვერავამ, მუნიციპალური განვითარების ფონდის აღმასრულებელმა დირექტორმა გიორგი შონიამ და ადგილობრივი ხელისუფლების წარმომადგენლებმა.

სოფელ ჭითაწყარის 300 მოსწავლეზე გათვლილი საჯარო სკოლის რეაბილიტაცია დასრულების ეტაპზეა. სოფელ რუხში კი 100 მოსწავლეზე გათვლილი ახალი საჯარო სკოლა თანამედროვე სტანდარტების შესაბამისად შენდება.

პროექტების ფარგლებში მოეწყობა საკლასო ოთახები, ბიბლიოთეკები, სამეცნიერო ლაბორატორიები, კვების სივრცეები, ადმინისტრაციული და მუსიკის ოთახები, სპორტული დარბაზები, სათამაშო მოედნები და რეკრეაციული ზონები.

ორივე სკოლა სრულად იქნება ადაპტირებული სპეციალური საგანმანათლებლო საჭიროების მქონე მოსწავლეებისთვის.

ზუგდიდის ყოფილი მერი გიორგი (გეგა) შენგელია, რომელიც ბოლოს გიორგი გახარიას პოლიტიკურ გუნდს წარმოადგენდა პოლიტიკას ტოვებს. ინფორმაციას ის ფეისბუქის ოფიციალურ გვერდზე აქვეყნებს.

„დღეს მსურს გაგიზიაროთ მნიშვნელოვანი გადაწყვეტილება –

მივიღე გადაწყვეტილება შევწყვიტო პოლიტიკური აქტივობა და ისევ კერძო სექტორში მოვსინჯო ჩემი ძალები.

პოლიტიკაში გატარებული წლები ჩემთვის იყო დიდი პასუხისმგებლობის, გამოცდილების, ადამიანებთან ურთიერთობისა და ქვეყნის სამსახურის შესაძლებლობა. მადლობელი ვარ თითოეული ადამიანის, ვისთანაც ამ გზაზე თანამშრომლობა და იდეების გაზიარება მომიწია“ - წერს გიორგი შენგელია.

გიორგი შენგელია ზუგდიდის მერობის კანდიდატად „ქართულმა ოცნებამ“ ზუგდიდის მერის რიგგარეშე არჩევნებზე 2019 წელს წარადგინა, მმართველი გუნდის კანდიდატმა არჩევნებში 2019 წლის 19 მაისს გაიმარჯვა. გიორგი შენგელიამ თანამდებობა 2021 წლის 17 მაისს დატოვა და გადამდგარი, ყოფილი პრემეირ-მინისტრის გიორგი გახარიას პარტიას შეუერთდა. მოგვიანებით გიორგი შენგელიამ, ამჯერად გახარიას პარტიიდან იყარა კენჭი ზუგდიდის მერობისთვის, თუმცა არჩევნებში დამარცხდა.

წალენჯიხის მუნიციპალიტეტში ინფრასტრუქტურული პროექტების განხორციელება აქტიურად მიმდინარეობს.

მიმდინარე სამუშაოებს ფოთის ქუჩაზე წალენჯიხის მუნიციპალიტეტის მერის პირველი მოადგილე ბესიკ ფარცვანია,მერის მოადგილე გიორგი კვარაცხელიასთან და საკრებულოს წევრთან გიორგი ქარდავასთან ერთად გაეცნო.

პროექტის ფარგლებში, გზაზე ასფალტის საფარი იგება, ასევე რკინა-ბეტონის სანიაღვრე არხები, ცხაურები და ეზოსთან მისასვლელები მოეწყობა.

პროექტი რეგიონებში განსახორციელებელი პროექტების ფონდიდან ფინანსდება. საგზაო ინფტასტრუქტურის გაუმჯობესება კი მოსახლეობის უსაფრთხო და კომფორტულ გადაადგილებას შეუწყობს ხელს.

განათლების, მეცნიერებისა და ახალგაზრდობის მინისტრის გივი მიქანაძის ხელმძღვანელობით, შოთა მესხიას ზუგდიდის სახელმწიფო უნივერსიტეტში რექტორთა საბჭოს სხდომა გაიმართა, რომელშიც საქართველოს სახელმწიფო და კერძო უნივერსიტეტების რექტორები და წარმომადგენლები მონაწილეობდნენ.

საბჭოს წევრებმა უმაღლესი განათლების სისტემის რეფორმის ფარგლებში მიმდინარე პროცესები განიხილეს. აღინიშნა, რომ რეფორმის ერთ-ერთი უმთავრესი მიმართულებაა, სახელმწიფო უნივერსიტეტებში უმაღლესი განათლების პირველ და მეორე საფეხურებზე საქართველოს მოქალაქეებისთვის სწავლის სრულად დაფინანსების უზრუნველყოფა.

შეხვედრის ფარგლებში მონაწილეებმა უმაღლესი განათლების დაფინანსების ახალი მოდელის დადგენილების პროექტი განიხილეს.

გივი მიქანაძის თქმით, ახალი მოდელი ეფუძნება ორკომპონენტიან სისტემას – საბაზო დაფინანსებასა და სახელმწიფო დაკვეთის შესრულებაზე დაფუძნებულ დაფინანსებას. როგორც მინისტრმა განაცხადა, ეს, ერთი მხრივ, უზრუნველყოფს სახელმწიფო უნივერსიტეტების ინსტიტუციურ მდგრადობასა და ფინანსურ ავტონომიას, მეორე მხრივ, ხელს შეუწყობს ხარისხზე, შედეგებსა და ეროვნულ პრიორიტეტებზე ორიენტირებული სისტემის განვითარებას.

აღინიშნა, რომ უმაღლესი განათლების დაფინანსების ახალი მოდელის პროექტის შემუშავების პროცესში აქტიურად იყვნენ ჩართული მსოფლიო ბანკის წარმომადგენლები.

შეხვედრა დისკუსიის ფორმატში წარიმართა და საბჭოს წევრებმა რიგ საკითხებთან დაკავშირებით ერთობლივი გადაწყვეტილებები მიიღეს.

რექტორთა საბჭოში მონაწილეობა ასევე მიიღეს საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ, საზღვაო ტრანსპორტის სააგენტოს დირექტორმა ივანე აბაშიძემ და კულტურის სამინისტროს წარმომადგენლებმა.

აბაშის სოფელ სუჯუნაში 50 ბავშვზე გათვლილი საბავშვო ბაღის მშენებლობა მიმდინარეობს.

პროექტის ფარგლებში სოფელ სუჯუნაში აშენდება თანამედროვე სტანდარტების შესაბამისი საბავშვო ბაღი, რომელიც სრულად იქნება ადაპტირებული ბავშვების საჭიროებებზე და უზრუნველყოფს მათთვის უსაფრთხო, კომფორტულ და განვითარებაზე ორიენტირებულ გარემოს.

მიმდინარე სამშენებლო სამუშაოებს ინფრასტრუქტურის მინისტრი რევაზ სოხაძე, სამეგრელო-ზემო სვანეთის მხარეში სახელმწიფო რწმუნებული დავით ვერავა, მუნიციპალური განვითარების ფონდის აღმასრულებელი დირექტორი გიორგი შონია, აბაშის მერი გიგა გაბელაია და საკრებულოს თავმჯდომარე იასონ კიზირია გაეცნენ.

ასევე მოეწყობა თანამედროვე სტანდარტების შესაბამისი სათამაშო მოედანი, რომელიც აღიჭურვება სხვადასხვა ტიპის ატრაქციონებითა და უსაფრთხო, რბილ ზედაპირიანი საფარით.

პროექტი სრულად ხორციელდება საქართველოს მთავრობის დაფინანსებით.

აბაშაში საფეხბურთო ტექნიკური ცენტრისა და ახალი სტადიონის მშენებლობა მიმდინარეობს.

მოეწყობა თანამედროვე სტანდარტების შესაბამისი სპორტული ინფრასტრუქტურა, მათ შორის ხელოვნური საფარი და შესაბამისი ტექნიკური სისტემები, რაც ობიექტის უსაფრთხო და ეფექტიან ფუნქციონირებას უზრუნველყოფს.

აბაშაში მიმდინარე საფეხბურთო ტექნიკური ცენტრისა და ახალი სტადიონის სამშენებლო სამუშაოებს ინფრასტრუქტურის მინისტრი რევაზ სოხაძე, სამეგრელო-ზემო სვანეთის მხარეში სახელმწიფო რწმუნებული დავით ვერავა, მუნიციპალური განვითარების ფონდის აღმასრულებელი დირექტორი გიორგი შონია, აბაშის მერი გიგა გაბელაია და საკრებულოს თავმჯდომარე იასონ კიზირია გაეცნენ.

ხობის მუნიციპალიტეტის სოფელ ხეთაში საჯარო სკოლის სარეაბილიტაციო სამუშაოები დასრულდა.

განახლებული სკოლა 435 მოსწავლეზეა გათვლილი, პროექტის ფარგლებში სკოლა თანამედროვე საერთაშორისო სტანდარტების შესაბამისად განახლდა და სრულად ადაპტირდა შეზღუდული შესაძლებლობის მქონე პირებისთვის.

განხორციელებულ სამუშაოებს - ინფრასტრუქტურის მინისტრი რევაზ სოხაძე, განათლების, მეცნიერებისა და ახალგაზრდობის მინისტრი გივი მიქანაძე, სამეგრელო-ზემო სვანეთის მხარეში სახელმწიფო რწმუნებულ დავით ვერავა, მუნიციპალური განვითარების ფონდის აღმასრულებელ დირექტორი გიორგი შონია, ხობის მერი დავით ბუკია და საკრებულოს თავმჯდომარე გოჩა ქაჯაია გაეცნენ.