8 მარტს, ქვეყნის ტერიტორიული მთლიანობისათვის ბრძოლაში დაღუპულ საქართველოს ეროვნულ გმირს, სენაკის ღირსეულ შვილს, გენერალ-მაიორ გენო ადამიას 90 წელი შეუსრულდებოდა.

სენაკის მუნიციპალიტეტის მერმა, ვახტანგ გადელიამ, მოადგილე ნანა ზარანდიასთან, საკრებულოს თავმჯდომარის მოადგილეებთან და ადგილობრივი თვითმმართველობის წარმომადგენლებთან ერთად, საქართველოს ეროვნული გმირის ბიუსტი გვირგვინით შეამკო და მის ხსოვნას პატივი მიაგო.

23-ე ბრიგადის მეთაური და სოხუმის გარნიზონის უფროსი, თითქმის ყველა მნიშვნელოვან სამხედრო ოპერაციას ხელმძღვანელობდა.

გენო ადამია კოდორის ხიდზე, სოხუმის დაცემიდან მეორე დღეს, 1993 წლის 28 სექტემბერს მაშინ მოკლეს, როცა სოხუმში შესვლას ცდილობდა.

გენო ადამიასთან ერთად იბრძოდა მისი ორი ვაჟი.

ოთხი თვის შემდეგ, გენერალ-მაიორის ნეშტი, საქართველოში გადმოასვენეს და სამხედრო პატივით, ქართულ მიწას მიაბარეს.

2020 წელს, გენო ადამიას ეროვნული გმირის წოდება მიენიჭა. გმირის სახელობის გახდა სენაკის პირველი საჯარო სკოლა და ქალაქის ერთ-ერთი ქუჩა.