ჩხოროწყუს მუნიციპალიტეტის მერი ჯუმბერ იზორია და საკრებულოს თავმჯდომარე ჯანო პერტაია, მოადგილეებთან ერთად, სოფელ ლესიჭინეში მცხოვრებ, სოციალურად დაუცველ ფრიდონ კოხიას ოჯახს ესტუმრნენ და მათ მეშვიდე შვილის შეძენა მიულოცეს.

მუნიციპალიტეტის მერიის „ახალშობილთა დახმარების“ პროგრამის ფარგლებში, ოჯახს ადგილობრივი ბიუჯეტიდან 15 000 ლარი გადაეცა. აღსანიშნავია, რომ კოხიების ოჯახი ასევე სარგებლობს „მრავალშვილიანი ოჯახების დახმარების“ პროგრამით და მერიიდან ყოველთვიურად ფინანსურ მხარდაჭერას იღებს.

„მსურს, გულითადად მივულოცო ოჯახს ეს სიხარული, ვუსურვო ჯანმრთელობა და კეთილდღეობა. მადლობა მშობლებს იმ უდიდესი პასუხისმგებლობისთვის, რასაც შვილების აღზრდა ჰქვია. შვიდი შვილის აღზრდა ნამდვილად დასაფასებელი და მისაბაძი საქმეა. ჩვენთვის მათი მხარდაჭერა მხოლოდ სოციალური ვალდებულება კი არა, განსაკუთრებული პრიორიტეტია. სწორედ ამიტომ, მუნიციპალიტეტს აქვს პროგრამები, რომლებიც ახალშობილთა და მრავალშვილიან ოჯახთა ხელშეწყობას ემსახურება.” - აღნიშნა ჯუმბერ იზორიამ.