წალენჯიხის საკრებულოს თავმჯდომარედ ცოტნე შონია აირჩიეს
დღეს წალენჯიხის მუნიციპალიტეტის საკრებულოში ახლადარჩეული საკრებულოს პირველი სხდომა გაიმართა. წალენჯიხის მუნიციპალიტეტის საკრებულოს პირველი სხდომა წალენჯიხის N68-ე საოლქო საარჩევნო კომისიის თავმჯდომარემ ანა მიქავამ გახსნა.
წალენჯიხის მუნიციპალიტეტის საკრებულოს თავმჯდომარის პოზიციაზე ფარული კენჭისყრით ცოტნე შონია აირჩიეს. მის კანდიდატურას 27-მა დეპუტატმა დაუჭირა მხარი. ასევე ფარული კენჭისყრით საკრებულოს თავმჯდომარის პირველ მოადგილედ გივი კაჭარავა, მოადგილეებად – ბაკურ სონგულია და დარეჯან დადიანი აირჩიეს. კენჭისრაში მონაწილეობა არ მიუღია პარტია „ლელოს“ და „გახარია-საქართველოსთვის“ წარმომადგენლებს.
სხდომაზე ფარული კენჭისყრის საფუძველზე საკრებულოს წევრებმა აირჩიეს წალენჯიხის მუნიციპალიტეტის საკრებულოს კომისიის თავმჯდომარეები.
საკრებულოს სამანდატო, იურიდიული და საპროცედურო საკითხთა კომისიის თავმჯდომარედ მანანა ჭანია, საფინანსო-საბიუჯეტო კომისიის თავმჯდომარედ გიორგი ქარდავა, ქონების მართვისა და ბუნებრივი რესურსების საკითხთა კომისიის ტავმჯდომარედ დალი კვარაცხელია, სივრცით-ტერიტორიული დაგეგმარებისა და ინფრასტრუქტურის კომისიის თავმჯდომარედ დათა კუკავა, ხოლო სოციალურ საკითხთა კომისია – თავმჯდომარედ ნანა კეკუა იქნა არჩეული.
