ზუგდიდის სპორტკომპლექსის სერვისებით სარგებლობას მოქალაქეები ათდიან სატესტო პერიოდში უფასოდ შეძლებენ
სამეგრელო-ზემო სვანეთის სახელმწიფო რწმუნებულმა დავით ვერავამ, სპორტის მინისტრის მოადგილე ირაკლი დოლაბერიძემ და ადგილობრივი ხელისუფლების წარმომადგენლებმა ქალაქ ზუგდიდში მდებარე თანამედროვე სტანდარტების შესაბამისი სპორტული კომპლექსი დაათვალიერეს და მიმდინარე ტექნიკურ სამუშაოებს გაეცნენ. ინფორმაციას სპორტის სამინისტრო ავრცელებს.
„სპორტკომპლექსში ამ ეტაპზე სპორტის სამინისტროს ექსპერტების ჯგუფის მიერ ტექნიკური პარამეტრების შემუშავება, შესაბამისი კვალიფიკაციის მქონე გუნდის დაკომპლექტება და ადმინისტრაციული საკითხების მოგვარება მიმდინარეობს.
ამასთანავე, დაწყებულია სპორტული კომპლექსის ქალაქ ზუგდიდის მერიისგან საქართველოს სპორტის სამინისტროსთვის გადმოცემის პროცედურები.
უახლოეს დღეებში სპორტული კომპლექსი ათდღიანი სატესტო რეჟიმით დაიწყებს ფუნქციონირებას. ამ პერიოდის განმავლობაში დაინტერესებულ პირებს შესაძლებლობა ექნებათ უფასოდ ისარგებლონ სპორტკომპლექსში არსებული აქტივობებით.
სპორტკომპლექსში განთავსებულია დიდი (33×25მ) და პატარა (16×8მ) ზომის საცურაო აუზები, სავარჯიშო და ძალოსნობის დარბაზები. სპორტული კომპლექსი აღჭურვილია ცურვის, წყალბურთის და ძალოსნობის შეჯიბრების ჩასატარებლად აუცილებელი ინვენტარით“ – ნათქვამია გავრცელებულ ინფომაციაში.
