ხობის მერმა სპორტსმენებს მსოფლიო ჩემპიონატზე წარმატებით ასპარეზობა მიულოცა
ხობის მუნიციპალიტეტის მერი დავით ბუკია, მერის პირველი მოადგილე რევაზ ზაქარაია და მერის მოადგილე დავით ბერაია ბერძნულ-რომაულ ჭიდაობასა და მკლავჭიდში გამართული მსოფლიო ჩემპიონატების გამარჯვებულ და პრიზიორ სპორტსმენებს და მათ მწვრთნელებს შეხვდნენ და მსოფლიო პირველობაზე წარმატებით ასპარეზობა მიულოცეს.
მოლდოვას რესპუბლიკის ქალაქ კიშინეუში გამართულ მსოფლიო ჩემპიონატზე “ხობის მუნიციპალიტეტის სპორტის ცენტრის” მკლავჭიდელებმა დიდი წარმატებით იასპარეზეს და სხვადასხვა სინჯის შვიდი მედალი მოიპოვეს. ახალგაზრდებს შორის მსოფლიო ჩემპიონი (მარჯვენა მკლავით), ვიცე-ჩემპიონი (მარცხენა მკლავით) და ბრინჯაოს პრიზიორი (უფროსებში) გახდა საბა დანელია. ვიცე-ჩემპიონები გახდნენ გიორგი ბუსქანძე (კადეტებში) და მერაბ გვალია (იუნიორებში).უფროსების კატეგორიაში ვერცხლის და ბრინჯაოს მედლები მოიპოვა დათუნა ჟიშკარიანმა.
იორდანიის დედაქალაქ ამანში გამართულ მსოფლიო ჩემპიონატზე 17- წლამდელთა შორის, ხობის მუნიციპალიტეტის სპორტის ცენტრის ბერძნულ-რომაული სტილით მოჭიდავე ვახტანგ ლოლუამ ვერცხლის მედალი მოიპოვა.
სპორტსმენებს და მათ მწვრთნელებს „ხობის მუნიციპალიტეტში სპორტის ხელშეწყობისა და განვითარების“ მუნიციპალური პროგრამით გათვალისწინებული ფულადი ჯილდო ჩაერიცხებათ.
