სენაკში მდინარე რიონზე გადასასვლელი ამორტიზირებული ბორანი ახლით შეიცვალა
სენაკის მუნიციპალიტეტში, 2024 წლის ინფრასტრუქტურული პროექტების ნუსხას, კიდევ ერთი მნიშვნელოვანი პროექტი შეემატა – ზემო ჭალადიდის ადმინისტრაციულ ერთეულში, მდინარე რიონზე გადასასვლელი ამორტიზირებული ბორანი ახლით შეიცვალა.
საქართველოში ერთ-ერთი უძველესი ბორანი ერთადერთი სატრანსპორტო საშუალებაა, რომლითაც სოფელი ჭალადიდი სირიაჩქონს უკავშირდება.
წლების მანძილზე, მდინარე რიონის ადიდებამ სენაკის მუნიციპალიტეტში არაერთხელ შექმნა პრობლემები. ბორნით სარგებლობა შეუძლებელი გახადა და გარესამყაროს, სოფელ სირიაჩქონში მცხოვრები ოჯახები მოწყვიტა.
უხვი ნალექის დროს, მდინარე მოსახლეობას მუდმივ საფრთხეს უქმნიდა, ასევე აზიანებდა საკარმიდამო ნაკვეთებს; გზის სავალ ნაწილზე შექმნილი დაზიანებები და მოშლილი ინფრასტრუქტურა კი – მოსახლეობას გადაადგილებისას პრობლემას უქმნიდა.
პრობლემების აღმოსაფხვრელად, სენაკის მუნიციპალიტეტის მერის, ვახტანგ გადელიას მერობის პერიოდში, ზემო ჭალადიდის ადმინისტრაციულ ერთეულში, მასშტაბური პროექტები განხორციელდა:
ჩატარდა ნაპირსამაგრი სამუშაოები;
ბორნისკენ მისასვლელ, სამ კილომეტრამდე გზის მონაკვეთზე, დაიგო ასფალტო-ბეტონის საფარი;
მოეწყო გარე განათების თანამედროვე სისტემა;
ტურისტული სივრცის მოწყობის კუთხით – საპიკნიკე და საკემპინგე ლოკაციები.
პროექტების განხორციელება სენაკის მუნიციპალიტეტის მერის, ვახტანგ გადელიას ერთ-ერთი წინასაარჩევნო დაპირება იყო, რომელიც შესრულდა.
დღეიდან, განახლებული ინფრასტრუქტურით, სენაკის მუნიციპალიტეტს კიდევ ერთი მრავალფუნქციური, მათ შორის, ტურისტული თვალსაზრისით ერთ-ერთი მნიშვნელოვანი სივრცე შეემატა.
![სენაკში შემორჩენილი ბორანი, რომელიც რიონზე მოძრაობს და ორ სოფელს აკავშირებს [ვიდეო]](https://api.stv.ge/uploads/null)
