შემოსავლების სამსახური ყულევში პანამის დროშის ქვეშ მცურავ გემზე: გემსა და გემის მფლობელ კომპანიაზე, ასევე ტვირთის გამომგზავნ და მიმღებ კომპანიებზე არ ვრცელდება საერთაშორისო სანქციები – ტვირთი ჩამოიცალა დროებითი შენახვის საბაჟო საწყობში
საქართველოს ფინანსთა სამინისტროს შემოსავლების სამსახური პანამის დროშის ქვეშ მცურავი გემის შესახებ, რომელიც ყულევის ნავსადგურში რუსეთის ფედერაციის პორტიდან შევიდა, განცხადებას ავრცელებს.
შემოსავლების სამსახური განმარტავს, რომ მიმდინარე წლის 2 ოქტომბერს, ყულევის საზღვაო ნავსადგურში რუსეთის ფედერაციის პორტიდან შემოვიდა პანამის დროშის ქვეშ მცურავი თბომავალი KAYSERI, რომელზეც დატვირთული იყო ერთ-ერთი რუსული კომპანიიდან (უწყება თავს იკავებს კომპანიების სახელწოდებების დასახელებისგან და საგადასახადო საიდუმლოების შემცველი ინფორმაციის გავრცელებისგან) გამოგზავნილი, იმპორტის საბაჟო პროცედურებში მოქცევისთვის განკუთვნილი 10 000 ტონამდე ნედლი ნავთობი.
უწყების თანახმად, საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოსა და შემოსავლების სამსახურის მიერ განხორციელებული შემოწმების შედეგად, დადასტურებულია, რომ გემსა და გემის მფლობელ კომპანიაზე, ასევე ტვირთის გამომგზავნ და მიმღებ კომპანიებზე არ ვრცელდება საერთაშორისო სანქციები (ინფორმაცია ხელმისაწვდომია ღია წყაროებით). აღნიშნულიდან გამომდინარე, შემდგომი საბაჟო კონტროლის პროცედურების განხორციელების მიზნით ტვირთი ჩამოიცალა დროებითი შენახვის საბაჟო საწყობში.
“ფინანსთა სამინისტროს შემოსავლების სამსახური და საქართველოს საზღვაო ტრანსპორტის სააგენტო კოორდინირებულად, მუდმივ რეჟიმში ახორციელებენ, როგორც გემების, ასევე გემთმფლობელების შემოწმებას საერთაშორისო სანქციებთან მიმართებით და თუ გემი, ან გემის მფლობელი არის სანქციების სიაში, მას არ ეძლევა საქართველოს ნავსადგურებში შემოსვლისა და საბაჟო პროცედურების განხორციელების უფლება.
სრული პასუხისმგებლობით ვაცხადებთ, რომ გავრცელებული ინფორმაცია ემსახურება საზოგადოების შეცდომაში შეყვანას“, – ნათქვამია განცხადებაში.
მსგავსი სიახლეები
ეკონომიკის სამინისტრო: ჩინური კონსორციუმის მიმართ საერთაშორისო სანქციები არ ვრცელდება
აშშ-ის საბაჟო და სასაზღვრო სამსახურის განკარგულებით, ახალი ტარიფები სმარტფონებზე, კომპიუტერებსა და ჩიპებზე არ გავრცელდება
