სენაკის მერი ,,განახლებული რეგიონების” ფარგლებში მიმდინარე სამუშაოებს გაეცნო
სენაკის მუნიციპალიტეტის მერი, ვახტანგ გადელია, ადგილობრივი თვითმმართველობის წარმომადგენლებთან ერთად, პრემიერ-მინისტრის ინიციატივით დაწყებული პროგრამის ,,განახლებული რეგიონების” ფარგლებში, სენაკის მუნიციპალიტეტში მიმდინარე სამუშაოებს გაეცნო.
ამ ეტაპზე, მიმდინარეობს რუსთაველის ქუჩაზე არსებული ცენტრალური პარკის მოწყობა-რეაბილიტაციის სამუშაოები, რომელიც მოიცავს ფასადების რეაბილიტაციას, რეკრეაციული და დასასვენებელი სივრცეების მოწყობას.
პროექტის ფარგლებში, ამ დროისთვის, დასრულებულია რუსთაველის ქუჩაზე არსებული ცენტრალური სკვერის მოწყობა-რეაბილიტიციის პირველი ეტაპი. სენაკის მუნიციპალიტეტს, ამ მასშტაბური პროექტის განხორციელებით, ორი განახლებული, მრავალფუნქციური რეკრეაციული სივრცე შეემატება, რომელიც როგორც ახალგაზრდების, ისე უფროსი თაობისათვის, განტვირთვის, გართობის და დასვენების ადგილი იქნება.
„განახლებული რეგიონების“ 4 წლიანი პროგრამა საქართველოს 63 მუნიციპალიტეტს მოიცავს. პროგრამა ითვალისწინებს რეგიონების ურბანულ განახლებას, რაც სახელმწიფოს, მუნიციპალიტეტის და კერძო საკუთრებაში არსებული მნიშვნელოვანი ობიექტის განვითარებას გულისხმობს.
პროგრამის დასრულების შემდეგ, ქვეყნის რეგიონებში განახლდება ცენტრალური ქუჩები, რეაბილიტირდება და მოეწყობა ახალი სკვერები და სხვა მუნიციპალური ინფრასტრუქტურა.
