ზუგდიდის მუნიციპალიტეტის მერია მანიების მრავალშვილიან ოჯახს სახლს აუშენებს
ზუგდიდის მუნიციპალიტეტის მერის მოვალეობის შემსრულებელმა, კონსტანტინე კაკავამ, ზედაეწერში მცხოვრებ მანიების მრავალშვილიან ოჯახს, რომელსაც დღეს მეხუთე შვილი შეეძინა, სოციალური სახლების მშენებლობის პროექტში შერჩევა, შვილის შეძენა მიულოცა და ახალშობილს ბედნიერი, ნათელი მომავალი უსურვა.
მანიების 7 სულიანი ოჯახი წლების განმავლობაში, ზედაეწერში, ყოფილ ადმინისტრაციულ შენობაში, მძიმე საყოფაცხოვრებო პირობებში ცხოვრობდა. ოჯახი მერიის პროგრამით, თანამედროვე სტანდარტებით აშენებულ, ახალ ოთხოთახიან საცხოვრებელ სახლს მიიღებს. მუნიციპალიტეტის მერის მოვალეობის შემსრულებელის კონსტანტინე კაკავას ინფორმაციით, დღეს სპეციალური კომისიის მიერ მოხდა ახალი საცხოვრებელი სახლის პროგრამაში მონაწილე ოჯახების გამოვლენა, სწორედ გამოვლენილ 19 ოჯახიდან ერთ-ერთი მანიების მრავალშვილიანი ოჯახია. ამავე კომისიაზე დასახელდა ის 19 ოჯახი, რომელებიც „ერთი თბილი ოთახი-ს“ პროგრამაში ჩაერთვებიან. ზუგდიდის მუნიციპალიტეტის მერიისთვის ერთ-ერთი პრიორიტეტი მოქალაქეებისთვის სოციალური სერვისების ხელმისაწვდომობა და სოციალური უზრუნველყოფაა.
„მნიშვნელოვანია ჩვენი მოქალაქეები მუდმივდ გრძნობდნენ სახელმწიფოს მხრიდან მხარდაჭერას, გვერდში დგომას. „სახლების მშენებლობა“ და „ერთი თბილი ოთახი“ არის სოციალური პროგრამებიდან ერთერთი უმნიშვნელოვანესი პროგრამა და მომავალშიც აუცილებლად გაგრძელდება. ზოგადად მუნიციპალიტეტის საბინაო პოლიტიკა, საშუალო და გრძელვადიან პერსპექტივაში გულისხმობს ყველა იმ ადამიანის დაკმაყოფილებას საცხოვრებელი ფართით, ვინც დღეს მძიმე საყოფაცხოვრებო პირობებში ცხოვრობს. ჩვენ მიზნად ვისახავთ სოციალური პროგრამების შეძლებისდაგვარად გაფართოებას, ბიუჯეტის გაზრდას, რომ ყველა სახის დახმარების საჭიროების მქონე ადამიანს მივწვდეთ და შევუქმნათ ნორმალური საყოფაცხოვრებო პირობები. – აღნიშნა მერის მოვალეობის შემსრულებელმა კონსტანტინე კაკავამ.
ცნობისთვის, ზუგდიდის მუნიციპალიტეტში, სოციალურად დაუცველი ოჯახებისთვის სახლების მშენებლობა 2015 წელს დაიწყო და დღემდე პროგრამაში 141 ოჯახია ჩართული.
