სამეგრელოს გუბერნატორმა ფერმერთა ჯგუფებს შესაწამლი აპარატები გადასცა
საქართველოს თხილის მწარმოებელთა ასოციაციამ “თხილის გადარჩენის” პროგრამის ფარგლებში, სახელმწიფო რწმუნებულთან ალექსანდრე მოწერელიასთან ერთად ფერმერთა ჯგუფებს შესაწამლი აპარატები გადასცა. ამ ეტაპზე ზუგდიდის მუნიციპალიტეტის სოფელ ორსანტიის, კოკის და ხურჩას მოსახლეობას 26 შესაწამლი აპარატი გადაეცა, ფერმერები ადგილზე გაეცნენ აპარატის გამოყენების ინსტრუქციას და თხილის შეწამვლის ზუსტ განრიგს.
თხილის მოსავლის გადარჩენის კამპანია ახლა უკვე მთავარ საფეხურზე გადადის. თხილის მწარმოებელთა ასოციაცია კამპანიას _ “გადავარჩინოთ თხილის მოსავალი” სოფლის მეურნეობის და გარემოს დაცვის სამინისტროს, სახელმწიფო რწმუნებულის აპარატის, ადგილობრივ თვითმმართველობების, კომპანია ფერეროსა და USAID–ის მხარდაჭერით ახორციელებს.
სახელმწიფოსგან მიღებულ შესაწამლ აპარატებს ასოციაცია ფერმერებს უსასყიდლოდ გადასცემს და ბაღის მოვლისა და შეწამვლის ყველა ეტაპზე პროცესს კოორდინირებას გაუწევს.
