ვის დაასახელებს ზუგდიდის მერობის კანდიდატად “ქართული ოცნება”?
ზუგდიდის მერობისთვის ფარულად და ღიად რამდენიმე კანდიდატი იბრძვის. უმეტესობის ოცნებაა “ქართული ოცნების” რჩეული გახდეს. მმართველი გუნდი კი ჯერჯერობით თავის რჩეულს არ ასახელებს.
“ქართული ოცნების” კულუარებში ამბობენ, რომ ზუგდიდის მერობის კანდიდატზე პოლიტსაბჭოს სხდომაზე უნდა შეჯერდნენ, რომელიც ხვალ, 22 მარტს “ქართული ოცნების” ცენტრალურ ოფისში გაიმართება. რჩეულ კანდიდატს კი ოფიციალურად მიმდინარე კვირის დასასრულს წარადგენენ.
STV-ს ინფორმაციით, “ქართული ოცნების” ოფისში დაიბარეს სამეგრელო-ზემო სვანეთის მხარის გუბერნატორის მოადგილე მალხაზ თორია. თუ რა საკითხებთან დაკავშირებით, ჩვენთვის უცნობია. ცნობისათვის, მალხაზ თორია ერთ-ერთი ფავორიტია ზუგდიდის მერობაზე, რომელიც მმართველ პარტიაში განხილვის საგანი დიდი ხანია არის. მალხაზ თორია “ქართული ოცნების” სარეიტინგო სიებშიც მოხვდა და მან შვიდეულში მეხუთე ადგილი დაიკავა.
რაც შეეხება მეორე კანდიდატს, ზუგდიდის მერის პირველ მოადგილეს გიორგი შენგელიას, ის ზუგდიდშია. გეგა შენგელია აღნიშნულთან დაკავშირებით პრესასთან კომენტარს არ აკეთებს და აცხადებს, რომ მან არაფერი იცის კანდიდატების შერჩევის შესახებ. უნდა აღინიშნოს, რომ ზუგდიდის მერობის რეალურ კანდიდატად ამ ეტაპზე გიორგი შენგელიას განიხილავენ. საჯარო უწყებებსა და საზოგადოებაში მთავარ მინიშნებებს სწორედ მასზე აკეთებენ.
ბოლო დღეებში კიდევ ერთი კანდიდატი გამოჩნდა. ზუგდიდელი ზუკა ალშიბაია, რომელიც აქამდე თბილისის მერიასა და საქართველოს პარლამენტში მუშაობდა. როგორც ადგილზე ვიგებთ, ზუკა ალშიბაია ის კანდიდატი იქნება, რომელსაც ზუგდიდელი ახალგაზრდების უმრავლესობა მხარს დაუჭერს.
მმართველი პარტია ჯერჯერობით დუმს. საკუთარ ფავორიტზე საუბარს გაურბიან ზუგდიდის მაჟორიტარი დეპუტატებიც, თუმცა გარკვეული სახის სიმპათიები მათაც გააჩნიათ.
