ქართველმა ახალგაზრდებმა ევროსაბჭოში რუსეთის მიერ საქართველოს ოკუპაცია გააპროტესტეს
ევროსაბჭოში რუსეთის ფედერაციის მიერ საქართველოს ოკუპაცია გააპროტესტეს. თბილისის პოლიტიკური სწავლების სკოლის მსმენელებმა ევროსაბჭოს სხდომათა დარბაზში ოკუპაციის საწინააღმდეგო ბანერები გაშალეს წარწერებით – „საქართველოს ტერიტორიის 20% ოკუპირებულია რუსეთის მიერ“ და „აფხაზეთი და ცხინვალის რეგიონი საქართველოა“.
დარბაზში სიტყვით პიანისტი დავით ალადაშვილი გამოვიდა. მან იქ მყოფ საზოგადოებას ხურვალეთში რუსი ჯარისკაცების მიერ გატაცებული მაია ოთინაშვილის საქმე შეახსენა და განაცხადა, რომ რუსეთის ოკუპაციის პირობებში, საქართველოში ყოველდღიურად ირღვევა ქალებისა და ბავშვების უფლებები, თითოეული მოქალაქის, ვინც ოკუპირებულ ტერიტორიაზე ცხოვრობს.
“რუსული ოკუპაცია თანაბრად არღვევს ქალებისა და კაცების უფლებებს ჩემ ქვეყანაში. დიდი იმედი მაქვს, რომ მალე ვისაუბრებთ გენდერულ თანასწორობაზე გამთლიანებულ საქართველოში“, – განაცხადა დავით ალადაშვილმა.
ევროპის საბჭოში დემოკრატიის მსოფლიო ფორუმი იმართება, რომლის მთავარი თემა გენდერული თანასწორობა და განვითარებად ქვეყნებში ქალთა მიმართ ძალადობის აღმოფხვრაა. ფორუმი 19 ნოემბერს დაიწყო და დღეს საღამოს დასრულდება. ფორუმს ევროსაბჭოს წევრი 47 ქვეყნის დელეგაცია ესწრება.
მსგავსი სიახლეები
სუს: სახელმწიფოსთვის ძირითად საფრთხეს კვლავ რუსეთის ფედერაციის მიერ აფხაზეთისა და ცხინვალის რეგიონების ოკუპაცია წარმოადგენდა
საქართველოს საგარეო საქმეთა სამინისტრო რუსეთის მიერ სოხუმის აეროპორტის უკანონო ამოქმედებისა და ოკუპირებულ აფხაზეთის რეგიონში საჰაერო და სარკინიგზო მიმოსვლის დაწყების გამო შეშფოთებას გამოთქვამს
