წალენჯიხაში ახალი საჯარო სკოლები შენდება
წალენჯიხის მუნიციპალიტეტის მერის პირველმა მოადგილემ ლაშა ჭანიამ და მერიის ეკონომიკისა და ინფრასტრუქტურის სამსახურის უფროსმა გელა სალიამ, ნაკიფუს ადმინისტრაციული ერთეულის სოფელ ლეჟაში, ჯგალის ადმინისტრაციული ერთეულის სოფელ კანთსა და ქალაქ წალენჯიხაში #4 საჯარო სკოლის მშენებლობის სამუშაოები დაათვალიერეს.
წალენჯიხის მუნიციპალიტეტის ნაკიფუს ადმინისტრაციული ერთეულის ლეჟას უბანსა და კანთში 60 მოსწავლეზე გათვლილი სკოლის მშენებლობა მიმდინარეობს. ტენდერი გამოცხადებულიქნა საქართველოს მუნიციპალური განვითარების ფონდის მიერ, ერთი ხელშეკრულების ფარგლებში Design-Build მეთოდით.
აღნიშნული სკოლების მშენებლობას ტენდერში გამარჯვებული ამხანაგობა -„სტარი“- ახორციელებს. სახარჯთაღრიცხვო ღირებულება შეადგენს 1,279,750.00 ლარს. მიმდინარეობს ასევე წალენჯიხის #4 საჯარო სკოლის მშენებლობაც. სამუშაოები, ახალი კორონავირუსის გავრცელების პრევენციის მიზნით, ჯანდაცვის სამინისტროს მიერ შემუშავებული სპეციალური რეკომენდაციების შესაბამისად ხორციელდება.
წალენჯიხის #4 საჯარო სკოლა 150 მოსწავლეზეა გათვლილი. სამუშაოებს ტენდერში გამარჯვებული .პ.ს „ ჯავა“ ასრულებს. სახარჯთაღრიცხვო ღირებულება შეადგენს 2 276 000 ლარს. წალენჯიხის მუნიციპალიტეტში ერთდროულად ოთხი ახალი სკოლის მშენებლობა ხორციელდება.
სკოლები ახალი ინვენტარითა და ტექნიკით აღიჭურვება, ექნება ცენტრალიზებული გათბობა, სასწავლო ლაბორატორია, ბიბლიოთეკა, კომპიუტერული კლასი და ღია სპორტული მოედანი. შენობები ადაპტირებული იქნება შშმ პირებზე.
