როგორ მოვამზადოთ მეგრული საცივი საახალწლო სუფრისთვის
საცივი საახალწლო სუფრის მთავარი კერძია. ჩვეულებრივ, საცივს ღომთან ერთად მიირთმევენ. საცივი ერთ-ერთი გავრცელებული სადღესასწაულო კერძია არა მხოლოდ სამეგრელოში, არამედ მთლიანად საქართველოში. გურმანების შეფასებით, მეგრული საცივი განსაკუთრებულად გემრიელია.
საცივი ნიგოზით, ხმელი სუნელებით და ინდაურის ან ქათმის ხორცით მზადდება. სამეგრელოში დამზადებულ საცივს ძირითადად თეთრი ფერი აქვს. მის დასამზადებლად არჩევენ, რაც შეიძლება თეთრ ნიგოზს და სანენებლებს.
ინგრედიენტები:
მარილი, წიწაკა - გემოვნებით
ყვითელი ყვავილი - 1 სუფრის კოვზი
უცხო სუნელი - 2 სუფრის კოვზი
ხმელი ქინძი - 1 სუფრის კოვზი
ხახვი - 1.00 დიდი თავი
ნიორი - გემოვნებით
დარიჩინი - 1 ნატეხი
მიხაკი
ნიგოზი, დაკეპილი/საცერში გამოყვანილი
ინდაური/ქათამი - 1 ც
მომზადების წესი
ინდაური (ან ქათამი) ჩავდოთ ქვაბში, დავასხათ წყალი და შემოვდგათ ცეცხლზე. ქვაბში ასევე მოვათავსოთ ნიორის კბილები, პატარა ბამბის ტოპრაკში ან დოლბანდში გამოკრული მიხაკ-დარიჩინი, ძაფით შეკრული მწვანილი და მთლიანი, გაფცქვნილი ხახვი. ბულიონს ქაფი მოვხადოთ და ვხარშოთ საშუალო ცეცხლზე. ამასობაში ნიგოზი 2-3-ჯერ გავატაროთ ხორცსაკეპ მანქანაში, დავუმატოთ ხმელი ქინძი, ყვითელი ყვავილი, უცხო სუნელი, მარილი, წიწაკა და ხელით მოვზილოთ, ზეთი რომ გამოედინება, შევინახოთ ჭურჭელში. ინდაური ნახევრად უნდა მოიხარშოს, გადავიტანოთ თუნუქის ფურცელზე და კარგად გახურებულ ღუმელში შევბრაწოთ. ბულიონიდან ამოვიღოთ მოხარშული სანელებლები, წვენი ნელ-ნელა ვასხათ ნიგოზს და თან საცერზე გავქნათ. ბულიონი უნდა იყოს თბილი, დაახლოებით 50 გრადუსი ტემპერატურის. გაქნილი ნიგოზი დარჩენილი ბულიონით გავაზავოთ სასურველი კონსისტენციის მიღებამდე, შევანელოთ მარილით. შემწვარი ინდაური (ან ქათამი) დავჭრათ, ჩავდოთ ჭურჭელში და დავასხათ საცივის წვენი, გავაცივოთ და ისე მივირთვათ. სუფრაზე მიტანის წინ საცივს ნიგვზის ზეთი მოვასხათ.
