წალენჯიხის მუნიციპალიტეტის სკოლამდელ სააღმზრდელო-საგანმანათლებლო დაწესებულებათა მართვის ცენტრში საბავშვო ბაღების პედაგოგებისა და აღმზრდელებისთვის პრაქტიკულ-თეორიული სემინარი ჩატარდა
„2026 წლის 17–18 აპრილს წალენჯიხამ უმასპინძლა შინაარსობრივად მდიდარ და პრაქტიკულად მნიშვნელოვან სემინარებს, რომლებმაც სკოლამდელი განათლების სფეროში ჩართულ პედაგოგებს ახალი ხედვები და ღირებული გამოცდილება შესძინა“ - ამის შესახებ ინფორმაციას წალენჯიხის მუნიციპალიტეტის სკოლამდელ სააღმზრდელო-საგანმანათლებლო დაწესებულებათა მართვის ცენტრი ავრცელებს.
„წალენჯიხის მუნიციპალიტეტის სკოლამდელ სააღმზრდელო-საგანმანათლებლო დაწესებულებათა მართვის ცენტრში შემავალი საბავშვო ბაღების პედაგოგებისა და აღმზრდელებისთვის ჩატარდა პრაქტიკულ-თეორიული სემინარი, რომლის მიზანიც მათი კვალიფიკაციის ამაღლება და პროფესიული უნარების გაძლიერება იყო. ღონისძიებას აქტიური ჩართულობით ესწრებოდნენ სხვადასხვა საბავშვო ბაღის წარმომადგენლები.
სემინარს კურირებდა ჩვენი წალენჯიხის მკვიდრი, ვალდორფის პედაგოგიკის სპეციალისტი, „კამპუსი ლისის“ დამფუძნებელი და საბავშვო ბაღის მენტორი ნანა ღვინჯილია.
პროფესიონალური გუნდის ჩამოყალიბებას საკუთარი ისტორია აქვს. შვეიცარიელმა წყვილმა, ელიზაბეტ და მარკოს როტლისბერგერებმა, რომლებიც 2009 წელს საქართველოში იმყოფებოდნენ, აღფრთოვანებულებმა გადაწყვიტეს საკუთარი გამოცდილება ადგილობრივი აღმზრდელებისთვის გაეზიარებინათ.
სემინარში მონაწილეობდნენ გამოცდილი და კვალიფიციური სპეციალისტები. რთული ქცევის მართვასა და ზღაპრის როლზე ბავშვის აღზრდის პროცესში ისაუბრა ფსიქოლოგმა თეონა გოგებაშვილმა.
ბავშვზე დაკვირვების მნიშვნელობაზე, როგორც პედაგოგიური მუშაობის ერთ-ერთ უმნიშვნელოვანეს კომპონენტზე, საინტერესო პრაქტიკული გამოცდილება გააზიარა ნანა ღვინჯილიამ.
სკოლამდელი ასაკის ბავშვის ჯანსაღ კვებაზე ისაუბრა ნუტრიციოლოგმა მაია ღვინჯილიამ. მან დეტალურად განმარტა, რატომ არის სწორი კვება კრიტიკულად მნიშვნელოვანი, გააცნო მსოფლიო ჯანდაცვის ორგანიზაციის (WHO) რეკომენდაციები და დამსწრეებს გაუზიარა პრაქტიკული რჩევები ჯანსაღი კვების ჩვევების დასანერგად.
თამაშის როლზე, როგორც სწავლისა და განვითარების მთავარ ინსტრუმენტზე, ისაუბრა ხელოვნებათმცოდნემ და ვალდორფის პედაგოგიკის სპეციალისტმა თეა როგავამ. მან ნათლად წარმოაჩინა თამაში, როგორც შემეცნების ბუნებრივი ფორმა, განსაკუთრებით სასკოლო მზაობისა და განვითარების სხვადასხვა ეტაპზე.
სიმღერის მნიშვნელობაზე სკოლამდელი აღზრდის პროცესში ისაუბრა გურანდა ზარქუამ, რომელმაც მსმენელებს პრაქტიკული გამოცდილება გაუზიარა და წარადგინა სხვადასხვა სახის ფერხული, რომელთა გამოყენებაც პედაგოგებს საკუთარ პრაქტიკაში შეუძლიათ.
ორდღიანი ინტენსიური მუშაობის დასასრულს გაიმართა დისკუსია და დღის შეჯამება კითხვა-პასუხის ფორმატში. სემინარი დასრულდა მონაწილეთათვის სერტიფიკატებისა და სიმბოლური საჩუქრების გადაცემით.
წალენჯიხის მუნიციპალიტეტის სკოლამდელ სააღმზრდელო-საგანმანათლებლო დაწესებულებათა მართვის ცენტრის ხელმძღვანელმა ნატო კვარაცხელიამ სემინარის მნიშვნელობაზე საუბრისას აღნიშნა, რომ მსგავსი ტიპის შეხვედრები განსაკუთრებულ როლს ასრულებს პედაგოგების პროფესიულ განვითარებაში. მისი თქმით, გამოცდილების გაზიარება, თანამედროვე მიდგომების გაცნობა და პრაქტიკული ცოდნის გაღრმავება პირდაპირ აისახება სკოლამდელი განათლების ხარისხზე და ბავშვთა აღზრდის პროცესზე. მან მადლობა გადაუხადა ტრენერებს გაწეული შრომისა და ღირებული ცოდნის გაზიარებისთვის და კიდევ ერთხელ გამოხატა მზადყოფნა მომავალშიც მსგავსი საგანმანათლებლო ინიციატივების მხარდაჭერისთვის.
სემინარის მიმდიანრეობას მუნიციპალიტეტის მერი გუბა საჯაია გაეცნო. როგორც მერმა აღნიშნა, თანამედროვე გამოწვევების ფონზე აუცილებელია განათლების სფეროში ჩართული სპეციალისტების მხარდაჭერა, მათი პროფესიული გაძლიერება და გამოცდილების მუდმივი გაზიარება. მისი თქმით, სწორედ ასეთი სემინარები ქმნის სივრცეს ინოვაციური მიდგომების დანერგვისა და პრაქტიკული ცოდნის გაღრმავებისთვის.
ამასთან, მერმა მადლობა გადაუხადა ორგანიზატორებს, ტრენერებსა და მონაწილეებს გაწეული შრომისა და აქტიური ჩართულობისთვის და გამოთქვა მზადყოფნა, რომ მუნიციპალიტეტი მომავალშიც მაქსიმალურად შეუწყობს ხელს მსგავსი საგანმანათლებლო ინიციატივების განხორციელებას.
ჩატარებულმა ორდღიანმა სემინარმა პედაგოგებსა და აღმზრდელებს მისცა შესაძლებლობა, გაეღრმავებინათ ცოდნა, გაცნობოდნენ თანამედროვე მიდგომებს და გაეზიარებინათ პრაქტიკული გამოცდილება, რაც პირდაპირ აისახება საგანმანათლებლო პროცესის ხარისხზე.
ასეთი ტიპის შეხვედრები არა მხოლოდ პროფესიული ზრდის ხელშეწყობას ემსახურება, არამედ ქმნის თანამშრომლობისა და გამოცდილების გაზიარების მყარ საფუძველს, რაც განსაკუთრებით მნიშვნელოვანია მომავალი თაობის სწორი აღზრდისა და განვითარებისათვის“ -აღნიშნავენ წალენჯიხის მუნიციპალიტეტის სკოლამდელ სააღმზრდელო-საგანმანათლებლო დაწესებულებათა მართვის ცენტრში.
მსგავსი სიახლეები
სკოლამდელი სააღმზრდელო-საგანმანათლებლო დაწესებულებათა მართვის ცენტრთან არსებულ 35 საბავშვო ბაღში ახალი სასწავლო წელი დაიწყო
წალენჯიხის სკოლამდელი სააღმზრდელო საგანმანათლებლო მართვის ცენტრის მენეჯმენტი რადიკალურად შეიცვალა
