წალენჯიხის მუნიციპალიტეტის სკოლამდელი სააღმზრდელო საგანმანათლებლო მართვის ცენტრის მენეჯმენტი რადიკალურად შეიცვალა. გაზრდილია მონიტორინგი ბაღებში, შექმნილია მონიტორინგის 2 ჯგუფი, რომლებიც უწყვეტ რეჟიმში ახორციელებენ კონტროლს: მეთოდოლოგიურად, სანიტარულ ჰიგიენური კუთხით,კვების თვალსაზრისით.მომსახურე პერსონალისა და აღსაზრდელების დასწრების მაჩვენებლის შედარებით ცენტრში მოწოდებულ ინფორმაციასთან.-ამის შესახებ წალენჯიხის სააღმზრდელო მართვის ცენტრში აცხადებენ.

მათი განმარტებით, მონიტორინგმა აღმოაჩინა ცალკეულ ბაღებში დარღვევები, რომელზეს რეაგირება მოახდინა. ასევე შეიცვალა ბავშვთა კვება.

“ამ ყველაფერმა მოგვცა სერიოზული ეკონომია კვებაში.მონიტორინგმა აღმოაჩინა,რომ ერთ-ერთ ბაღში არ იყო საწოლები და ბავშვები იწვნენ იატაკზე. არ ჰქონდათ სათამაშოები,არც ერთი თეთრი წლების განმავლობაში არ გაწერილა ბიუჯეტში სათამაშოებისთვის. ყველა ბაღიდან შემოვიდა მოთხოვნა ასევე სათამაშოებზე და უამრავ ინვენტარზე.უსწრაფესად იქნა ცენტრის მიერ შეძენილი 5 ორსართულიანი საწოლი და მიწოდებული კონკრეტული ბაღისთვის. ასევე შევიძინეთ 35-ვე ბაღისთვის 3-3 ეგზემპლარი ქართული წარმოების ეკოლოგიურად სუფთა შემეცნებითი სამაგიდო სათამაშოები, რომელიც გადავეცით ბაღებს და უკვე ახალი სასწავლო წლისთვის დახვდებათ აღსაზრდელებს ჯგუფებში.

მენიუ, რომელიც იქნა დაწუნებული სპეციალისტების მიერ იქნება შეცვლილი და ასევე ახალ სასწავლო წელს შევხვდებით განახლებული მენიუთი. იზრდება კარაქის რაოდენობა, ემატება კვერცხი, იოგურტი კვირაში ორჯერ და ფრანგული ტოსტი(ყიყლიყოს სახით). იანვრიდან კი დაემატება თევზი ორაგულის სახით, რომელიც ასევე აუცილებელია კვების რაციონში იყოს წარმოდგენილი”-აცხადებენ რესურსცენტრში და იქვე დასძენენ, რომ სისტემაში რეფორმები გრძელდება.

“რაც შეეხება მიმდინარე სტრუქტურული ოპტიმიზაციის პროცესს,რეფორმები გრძელდება,რეფორმები აუცილებელია და გარდაუვალი!!!ვცდილობთ ყველაფერი მოვაქციოთ კანონის ჩარჩოებში,რომ მაქსიმალურად ვიყოთ სტანდარტთან მიახლოებულები.საქმე გვაქვს ხელოვნურად გაზრდილ შტატებთან. არც ერთი დასაბუთებული ფაქტი არ არსებობს, რამ გამოიწვია კონკრეტულად აღმზრდელის თანაშემწეების ამ რაოდენობით ზრდა ჯგუფებში.12 ბაღი რჩება ხელუხლებელი სტრუქტურით, რადგან აკმაყოფილებენ მეტ ნაკლებად სტანდარტს, დანარჩენ 23-ში კი აუცილებელია სტრუქტურული ოპტიმიზაცია. აღნიშნული სტრუქტურა არ დარჩება უცვლელი დიდი ხანი, რადგან ავტორიზაციის პროცესი, რომელიც დაწყებულია ასევე ითვალისწინებს დამატებითი კადრების მოზიდვას, რომლის დეფიციტი ნამდვილად არსებობს რაიონში .ამიტომ რეფორმის შედეგად გამონთავისუფლებული კადრები აუცილებლად გადავლენ რეზერვში, რათა მომავალში მათი გადამზადების შემდეგ მოხდეს სწორედ ამ ადამიანებისგან შტატების შერჩევა. პროცესები იქნება გამჭვირვალე, სამართლიანი და შედეგზე ორიენტირებული. ვინაიდან  მთავარი ორიენტირი არის ბავშვი ,სწორედ მისი უფლებებიდან გამომდინარე უნდა ვიხელმძღვანელოთ და ვუპასუხოთ იმ გამოწვევებს,რისი შესრულებაც გვევალება დღეს, ხვალ და ა.შ.”-აცხადებენ წალენჯიხის სკოლამდელი სააღმზრდელო საგანმანათლებლო მართვის ცენტრში.