საქართველოს პარლამენტის თავმჯდომარე შალვა პაპილუაშვილი ვლაქერნობის დღესასწაულს დაესწრო. პაპუაშვილი მოსახლეობას ვლაქერნობას ულოცავს:

,,პარლამენტის წევრებთან ერთად დავესწარით ზუგდიდში ვლაქერნობის დღესასწაულს, სადაც საკათედრო ტაძარში სადღესასწაულო წირვა საქართველოს კათოლიკოს-პატრიარქმა, უწმინდესმა და უნეტარესმა შიო მესამემ აღავლინა.

საქართველო უფლის კვართისა და ღვთისმშობლის პატიოსანი სამოსლის მცველი ქვეყანაა. ეს არის უდიდესი პატივი, რომელიც ჩვენს ერს ერგო და ამავე დროს, ეს არის მნიშვნელოვანი პასუხისმგებლობაც. სწორედ ამიტომ, ჩვენი წინაპრების მსგავსად, ჩვენი ვალია, დავიცვათ ქრისტიანული რწმენა, ტრადიციები და ის სიწმინდეები, რომლებმაც საუკუნეების განმავლობაში შეინარჩუნა ჩვენი სახელმწიფო, ჩვენი თვითმყოფადობა და თავისუფლება.

განსაკუთრებული მნიშვნელობა აქვს იმას, რომ ვლაქერნობის დღესასწაულს წელს საქართველოს მიერ ქრისტიანობის სახელმწიფო რელიგიად გამოცხადების 1700 წლის იუბილეს ფარგლებში აღვნიშნავთ. ეს თარიღი კიდევ ერთხელ გვახსენებს, რომ ჩვენი სახელმწიფოებრივი და ეროვნული იდენტობა ქრისტიანულ საფუძველზეა აღმართული და სწორედ ამ საძირკველმა გააძლებინა საქართველოს მრავალსაუკუნოვანი განსაცდელები.

ჩვენი პატივი და პასუხისმგებლობაა, ჩვენი სიწმინდეები, ქრისტიანული რწმენა და სახელმწიფოს მემკვიდრეობა ღირსეულად შევინარჩუნოთ, გავუფრთხილდეთ და იმავე სულიერი სიმტკიცით გადავცეთ მომავალ თაობებს, როგორც ეს ჩვენმა წინაპრებმა შეძლეს.

ვლაქერნობის დღესასწაულს ვულოცავ სრულიად საქართველოს. ღმერთმა დალოცოს და გააძლიეროს ჩვენი ქვეყანა” - წერს შალვა პაპუაშვილი.