ოკუპირებლ აფხაზეთში მასწავლებლები პროტესტს გამოთქვამენ
ოკუპირებულ აფხაზეთში მასწავლებელთა ნაწილი უკმაყოფილოა დე-ფაქტო განათლების სამინისტროს გადაწყვეტილებით, რომელიც ითვალისწინებს სასწავლო წლის დასრულებამდე რამდენიმე თვით ადრე რეფორმას, რომლის მიხედვითაც ოკუპირებულ აფხაზეთში მოქმედ სკოლებში მე-9 და მე-11 კლასებში ალგებრა-გეომეტრიის წერითი გამოცდები უნდა ჩატარდეს.
„მასწავლებელთა საზოგადოება იმედოვნებს, რომ აფხაზეთის მთავრობის მეთაური მოუსმენს მათ აზრს“ – ასე ეხმაურება ფაქტს, დე ფაქტო პარლამენტის წევრი ნაურ ნარმანია, ის იმედოვნებს, რომ რეფორმა გადავადდება და დე-ფაქტო მთავრობა მასწავლებელთა მოთხოვნას დააკამყოფილებს.
„მასწავლებელთა საზოგადოება მიიჩნევს, რომ განათლების მინისტრის ინალ გაბლიას ინიციატივა
კარგ შედეგს ვერ მოიტანს“, – ამბობს ნაურ ნარმანია. დე ფაქტო დეპუტატის თქმით, თუნდაც ეს იდეალური გადაწყვეტილება იყოს, მისი შემოღება სკოლის დასრულებამდე რამდენიმე თვით ადრე მიუღებელია.
მიმდინარე წლის 11 მარტს აფხაზეთის პედაგოგიური საზოგადოების წარმომადგენლებმა დე-ფაქტო მთავრობას წერილობით მიმართეს და უკმაყოფილება გამოთქვეს ე.წ. განათლების მინისტრის 2024 წლის 8 თებერვლის ბრძანების მიმართ, რომელიც სკოლებში ალგებრა-გეომეტრიის წერით გამოცდებს ითვალისწინებს.
