ნოჯიხევში, ჭითაწყარსა და მუხურში, სოფლის ახალი ამბულატორიები გაიხსნა
პირველადი ჯანდაცვის რეფორმა გრძელდება – სერვისების გეოგრაფიული გაზრდის მიზნით, სამეგრელოში – ნოჯიხევში, ჭითაწყარსა და მუხურში, სოფლის ახალი ამბულატორიები გაიხსნა. სამედიცინო დაწესებულებები, ხობის, ზუგდიდისა და ჩხოროწყუს მუნიციპალიტეტების, 15 სოფლის მოსახლეობას ემსახურება.
ამბულატორიებში ჯანდაცვის მინისტრი მიხეილ სარჯველაძე, სახელმწიფო რწმუნებული დავით ვერავა, შესაბამისი მუნიციპალიტეტების მერები და სამედიცინო ჰოლდინგის ხელმძღვანელები იმყოფებოდნენ.
ამბულატორიები დაკომპლექტებულია კვალიფიციური სამედიცინო პერსონალით და აღჭურვილია პირველადი ჯანდაცვის მომსახურებისთვის საჭირო ინვენტარით.
ჯანდაცვის მინისტრის განცხადებით, სოფლებში, მაღალი ხარისხის პირველადი ჯანდაცვის სერვისების ხელმისაწვდომობის ზრდა უწყების პრიორიტეტია.
აღსანიშნავია, რომ ქვეყნის მასშტაბით, კიდევ 12 სოფლის ამბულატორიის მშენებლობა მიმდინარეობს. გეოგრაფიული ხელმისაწვდომობის გაზრდის მიზნით, პირველადი ჯანდაცვის დაწესებულებების მშენებლობა მომავალშიც გაგრძელდება.
