პრემიერმა მესხიას უნივერსიტეტში ახალი სასწავლო კორპუსი გახსნა
პრემიერ-მინისტრმა შოთა მესხიას ზუგდიდის სახელმწიფო უნივერსიტეტის ახალი სასწავლო კორპუსი გახსნა.
„ჩვენ გვაქვს ამბიციური გეგმა, ფუნდამენტური რეფორმები განვახორციელოთ საუნივერსიტეტო, უმაღლესი განათლების სფეროში, ამისთვის ვამუშავებთ კონცეფციას, რომელიც საზოგადოებას ახლო მომავალში წარედგინება”, – ამის შესახებ საქართველოს პრემიერ-მინისტრმა ირაკლი კობახიძემ შოთა მესხიას ზუგდიდის სახელმწიფო უნივერსიტეტის ახალი სასწავლო კორპუსის გახსნის ღონისძიებაზე სიტყვით გამოსვლისას განაცხადა.
მთავრობის მეთაურმა აღნიშნა, რომ ამ კონცეფციაში მნიშვნელოვანი ადგილი დაეთმობა რეგიონულ უნივერსიტეტებს და მათი შესაძლებლობების გაძლიერებას.
პრემიერ-მინისტრმა შოთა მესხიას ზუგდიდის სახელმწიფო უნივერსიტეტის განსაკუთრებულ როლზე ისაუბრა და განაცხადა, რომ ის არის ერთადერთი უმაღლესი საგანმანათლებლო დაწესებულება რეგიონში, რომელიც როგორც უმაღლესი განათლების, ისე პროფესიულ პროგრამებს ახორციელებს.
„უნივერსიტეტი ამზადებს კონკურენტუნარიან, მაღალკვალიფიციურ კადრებს, რომლებიც რეგიონის წარმატებულ მომავალს ქმნიან. ეს კადრები მნიშვნელოვან წვლილს შეიტანენ ჩვენი ქვეყნის სამომავლო განვითარებაში. ამ ყველაფერს განსაკუთრებულ სახელმწიფოებრივ მნიშვნელობას სძენს უნივერსიტეტის მდებარეობა საოკუპაციო ხაზის სიახლოვეს. ის ფაქტი, რომ სტუდენტების 40% აფხაზეთიდან დევნილი ან გამყოფი ხაზის მიმდებარე სოფლებში მცხოვრები ახალგაზრდაა, თქვენი უნივერსიტეტის მისიის გამორჩეულობას უსვამს ხაზს. სულ რაღაც 18 წლის წინ აქ 37 სტუდენტი სწავლობდა, დღეს ამ უნივერსიტეტში სწავლობს 2000 სტუდენტი, რაც მეტყველებს ძალიან სწრაფ წინსვლაზე. ეს წინსვლა და პროგრესი მომავალშიც უნდა გაგრძელდეს. თვალსაჩინოა აკადემიური ზრდაც. სასწავლო უნივერსიტეტი ჩამოყალიბდა სრულფასოვან უნივერსიტეტად, რომელსაც მნიშვნელოვანი პარტნიორობა აკავშირებს საერთაშორისო დონეზე სხვადასხვა უცხოურ უნივერსიტეტთან.
ეს პროცესი მიმდინარეობდა სახელმწიფოს მუდმივი მხარდაჭერის ფონზე, რაც ბოლო წლებში, მათ შორის, გამოიხატა არაერთი მნიშვნელოვანი ინფრასტრუქტურული პროექტით. დღევანდელი დღეც არის ამის კიდევ ერთი გამოხატულება“, – განაცხადა ირაკლი კობახიძემ.
პრემიერ-მინისტრმა, ვიცე-პრემიერთან ირაკლი ჩიქოვანთან, განათლების, მეცნიერებისა და ახალგაზრდობის მინისტრ გივი მიქანაძესთან, სახელმწიფო რწმუნებულ დავით ვერავასთან, აღმასრულებელი, საკანონმდებლო და ადგილობრივი ხელისუფლების წარმომადგენლებთან ერთად, 250 სტუდენტზე გათვლილი ახალი სასწავლო კორპუსი დაათვალიერა, რომელიც თანამედროვე სტანდარტების შესაბამის სასწავლო სივრცეებს – აუდიტორიებსა და ლაბორატორიებს მოიცავს.
უნივერსიტეტის რექტორმა თეონა ხუფენიამ მთავრობის მეთაურს მიაწოდა ინფორმაცია განხორციელებული სამუშაოების შესახებ, რომელთა შედეგად კორპუსში ასევე მოეწყო უწყვეტი განათლების ცენტრი და ბიბლიოთეკა სტუდენტებისა და უწყვეტი განათლების პროგრამებში ჩართული პირებისთვის.
ახალი სასწავლო კორპუსის მშენებლობა განათლების, მეცნიერებისა და ახალგაზრდობის სამინისტროს დაფინანსებით განხორციელდა. პროექტის ღირებულებამ 1 749 770 ლარი შეადგინა.
მსგავსი სიახლეები
![“პრაიმედმა” შიდსთან ბრძოლის კვირეული ზუგდიდის, შოთა მესხიას სახელობის სასწავლო უნივერსიტეტში დაასრულა [ფოტო]](https://api.stv.ge/uploads/2018/12/IMG_2395.jpg)
“პრაიმედმა” შიდსთან ბრძოლის კვირეული ზუგდიდის, შოთა მესხიას სახელობის სასწავლო უნივერსიტეტში დაასრულა [ფოტო]
ზუგდიდში შოთა მესხიას ზუგდიდის სახელმწიფო სასწავლო უნივერსიტეტში კომპანია კავკასიის საერთაშორისო ოლიმპიადამ პროგრამის პრეზენტაცია გამართა
