სალომე ზურაბიშვილი – დღევანდელ მსოფლიოში არასამთავრობოები ქალების დასაცავად უფრო ძლიერად გამოდიან
მსოფლიოში არასამთავრობოები ქალების დასაცავად უფრო ძლიერად გამოდიან, აქ პირიქით ხდება. ჩემი დამახინჯებული და კონტექსტიდან ამოვარდნილი სიტყვებით ილაშქრებენ ჩემ წინააღმდეგ, – ამის შესახებ პრეზიდენტობის დამოუკიდებელმა კანდიდატმა სალომე ზურაბიშვილმა რუსთაველის თეატრში მხარდამჭერებთან შეხვედრაზე სიტყვით გამოსვლისას განაცხადა.
პრეზიდენტობის დამოუკიდებელი კანდიდატის თქმით, ასეთი აგრესია და ძალადობა, რომელიც თან ახლავს წინასაარჩევნო კამპანიას, აქამდე არსად უნახავს.
სალომე ზურაბიშვილმა სიტყვით გამოსვლის დროს „რუსთავი 2“-ის გენერალური დირექტორის მიერ სოციალურ ქსელში გამოქვეყნებული განცხადება წაიკითხა, სადაც ნიკა გვარამია წერს, რომ ყველა, ვინც სალომე ზურაბიშვილს აფინანსებს, ან სხვაგვარად ეხმარება, უკიდურესად უნდა შეავიწროვონ.
„ეს სიტყვები ეკუთვნის ერთ-ერთი წარჩინებული ტელეარხის გენერალურ დირექტორს, რომელიც ასე გამოდის საარჩევნო კამპანიის დროს. ეს სიტყვები გებელსის პირსაც კი დაამშვენებდა.
მეცოდება ჩემი ქვეყანა, რომელიც ასეთი სიტყვებისა და ქცევების გამო, ვერ გამოდის, იმ საბჭოთა მარწუხებიდან, რომელიც გვეგონა, რომ დავტოვეთ უკან, იქ გვაბრუნებენ და გვაბრუნებენ ის ადამიანები, რომლებსაც ხან ევროპელებად და ხან დემოკრატებად მოაქვთ თავი.
დღევანდელ მსოფლიოში არასამთავრობოები ქალების დასაცავად უფრო ძლიერად გამოდიან. აქ ეს არ ხდება, პირიქით ხდება, რომ ჩემი დამახინჯებული და კონტექსტიდან ამოღებული სიტყვების საფუძველზე გამოილაშქრეს და ბრალს მდებენ რასიზმსა და ქსენოფობიაში, რაც არის ძალიან დიდი ბრალდება.
მე, როგორც მომავალი პრეზიდენტი, რომელიც არჩეული იქნება საზოგადოების მიერ, დიდწილად საზოგადოებასთან ერთად ვიმუშვებ. სამწუხაროა, რომ ორი ძლიერი და მნიშვნელოვანი ნაწილი – თავისუფალი მედია და არასამთავრობო სექტორი, ვერ არიან თავიანთი გამოწვევების სიმაღლეზე და ესეც უნდა გამოსწორდეს. საზოგადოების ცხოვრებისა და სახელმწიფოს მშენებლობის ეს ორი ბერკეტი აუცილებელია. აქ საუბარი არ არის, რომ უნდა შეიზღუდოს ან ერთი ან მეორე, მაგრამ ღირსება ორივესგან მოსათხოვია და მოეთხოვებათ“, – განაცხადა სალომე ზურაბიშვილმა.
“რუსთავი 2”-ის გენერალურმა დირექტორმა, ნიკა გვარამიამ სოციალურ ქსელში პრეზიდენტობის კანდიდატის, სალომე ზურაბიშვილის მხარდამჭერების შესახებ დაწერა და საზოგადოებას მათი დასჯისკენ მოუწოდა.
ამის შემდეგ, მორიგი პოსტი ჩაჩავას კლინიკის მეან-გინეკოლოგების შესახებ გამოაქვეყნა.
„ძირს ჩაჩავას კლინიკის ნაძირალა მეან-გინეკოლოგები, მასიურად რომ გადაწყვიტეს მოღალატე ზურაბიშვილის დონორობა“,- დაწერა გვარამიამ სოციალურ ქსელში.
სალომე ზურაბიშვილმა ევროკავშირის ელჩებს ნიკა გვარამიას პოსტების შესახებ ინფორმაცია მიაწოდა.
