ზუგდიდში მამია ალასანიას ბიუსტი გაიხსნა [POTO, VIDEO, REEL]

06.05.2023 / 6 მაისი 2023

ზუგდიდში, საქართველოს ეროვნული გმირის მამია ალასანიას ბიუსტი გაიხსნა. მამია ალასანია 6 მაისს 80 წლის გახდებოდა. ალასანიას ბიუსტი, ზუგდიდში ე.წ. „ფრანგულ პარკში“ გაიხსნა. ამ პარკში უკვე განთავსებულია ეროვნული გმირების მერაბ კოსტავას და გენო ადამიას ბიუსტები, ასევე 1924 წლის წლის აჯანყებულთა მემორიალი.

ბიუსტის გახსნის ცერემონიალს საკანონმდებლო, ადგილობრივი ხელისუფლების წარმომადგენლები, ვეტერანების საქმეთა სახელმწიფო სამსახურის დირექტორი და ალასანაის ოჯახის წევრები დაესწრნენ. მამია ალასანიას შვილმა ირაკლი ალასანიამ, რომელიც თავდაცვის ყოფილი მინისტრი იყო, ბიუსტის დადგმის გამო მადლობა გადაუხადა ზუგდიდის მერიას.

მამია ალასანია 1943 წლის 6 მაისს, სოფელ ანაკლიაში, გიორგობის დღეს დაიბადა. იმავე წელს ალასანიების ოჯახი ზუგდიდში გადასახლდა. მამია ალასანიამ 1961 წელს ზუგდიდის №1 საშუალო სკოლა დაამთავრა. მამია ალასანია 1974 წლიდან სამუშაოდ თბილისში უშიშროების კომიტეტის ცენტრალურ აპარატში გადავიდა და სხვადასხვა ხელმძღვანელ თანამდებობებზე მუშაობდა, მოგვიანებით კი სამხრეთ ოსეთის ავტონომიური ოლქის უშიშროების კომიტეტის უფროსი გახდა.

1993 წლის 27 სექტემბერს, მამია ალასანია ქალაქ სოხუმში მოკლეს, ის აფხაზეთის ომში იბრძოდა. 2017 წლის ოქტომბერში მამია ალასანიას ნეშტი იდენტიფიცირებულ იქნა და სამხედრო პატივით დაიკრძალა თბილისში.