რუხში მრავალპროფილური კლინიკის მშენებლობა ერთ თვეში დასრულდება
რეგიონული განვითარებისა და ინფრასტრუქტურის სამინისტროს ინფორმაციით, ზუგდიდის მუნიციპალიტეტის სოფელ რუხში მრავალპროფილური კლინიკის მშენებლობა დაახლოებით ერთ თვეში დასრულდება.
ამის შემდეგ ობიექტი აღჭურვისა და ექსპლუატაციისთვის დევნილთა, შრომის, ჯანმრთელობისა და სოციალური დაცვის სამინისტროს გადაეცემა.
შესრულებული სამუშაოების ხარისხი რეგიონული განვითარებისა და ინფრასტრუქტურის მინისტრმა, მაია ცქიტიშვილმა შეამოწმა.
„საპროექტო დოკუმენტაციაში და მშენებლობის პროცესშიც იყო პრობლემები, მაგრამ უკვე შეგვიძლია ვთქვათ, რომ მალე ობიექტი იმ მდგომარეობაში იქნება, რომ შევძლებთ ჯანდაცვის სამინისტროს გადავცეთ. ეს კლინიკა სულ ერთ კილომეტრშია აფხაზეთთან და მჯერა, რომ ეს არის შესანიშნავი შესაძლებლობა აფხაზი დებისა და ძმებისთვის, რათა ისარგებლონ ყველა იმ სერვისით, რასაც ჩვენი მთავრობა საყოველთაო ჯანდაცვის პროგრამის ფარგლებში საქართველოს მოსახლეობას სთავაზობს,“ – განაცხადა მაია ცქიტიშვილმა.
სამინისტროს ინფორმაციით, საუნივერსიტეტო საავადმყოფო 220 ადგილზეა გათვლილი. პარალელურად, სამედიცინო პროფილის სტუდენტებისა და რეზიდენტებისთვის კლინიკის ტერიტორიაზე აუდიტორიები და ბიბლიოთეკა, სპორტულ-გამაჯანსაღებელი ინფრასტრუქტურა, აუზები და სკვერები მოეწყობა.
პროექტის ღირებულებაა 41 500 000 ლარია. სამუშაოებზე დასაქმებულების დიდი ნაწილი ადგილობრივი მცხოვრები იყო.
მსგავსი სიახლეები
სოფელ რუხში მრავალპროფილური სამედიცინო კლინიკის მშენებლობა დასრულდა
ზუგდიდში კორონავირუსი ერთ-ერთი კერძო კლინიკის ექიმს და “პროკრედიტ ბანკის” ერთ თანამშრომელს დაუდასტურდა
