თენგო ქობალიას ოჯახის წევრები და ახლობლები ზუგდიდში აქციას მართავენ
ზუგდიდის მერიის ეკონომიკური მართვისა და მუნიციპალური სერვისების სამსახურის ყოფილი უფროსის თენგო ქობალიას ახლობლები სახელმწიფო უსაფრთხოების სამსახურის სამეგრელო-ზემო სვანეთის განყოფილების წინ საპროტესტო აქციას მართავენ. ისინი ქობალიას უდანაშაულობაში დარწმუნებულები არიან და მის გათავისუფლებას ითხოვენ.
ცნობისთვის, თბილისის საქალაქო სასამართლოში ზუგდიდის მერიის ყოფილი მაღალჩინოსნების საქმეზე წინასასამართლო სხდომა გუშინ გაიმართა. დაცვის მხარემ პროკურატურის მიერ წარდგენილი ფარული აუდიო ჩანაწერის დაუშვებლად ცნობა მოითხოვა, სადაც საქმეში დაზარალებული და ზუგდიდის მერიის ყოფილი მაღალჩინოსნები შესაძლო ქრთამის აღების ფაქტზე საუბრობენ.
დაცვის მხარემ აღკვეთის ღონისძიების შეცვლაც მოითხოვა, თუმცა მოსამართლემ ადვოკატების შუამდგომლობები არ დააკმაყოფილა. ფარული ჩანაწერი საქმეს დაერთო და ოთხივე ბრალდებული პატიმრობაში დარჩა. ზუგდიდის ყოფილი მერი და ვიცემერი პირველ ნოემბერს განსაკუთრებით დიდი ოდენობით ქრთამის აღების ფაქტზე დააკავეს.
თენგიზ ქობალიას და ხუტა ბაღათურიას კი გამოძიება დანაშაულის შეუტყობინებლობას და ცრუ ჩვენებას ედავება.
