ყოფილ და მოქმედ თანამდებობის პირებს სუს-ში იბარებენ – რა ხდება სამეგრელოში?
სახელმწიფო უსაფრთხოების სამსახურში სამეგრელო-ზემო სვანეთის ყოფილი გუბერნატორის ექსმოადგილის დათო კოდუას გამოკითხვა რამდენიმე წუთის წინ დასრულდა. გამოკითხვიდან გამოსულა კოდუამ ჟურნალისტებთან კომენტარი გააკეთა.
კოდუას განაცხადა, რომ მას მას კორუფციულ გარიგებებთან “შეხება არ ჰქონია”. მისი განცხადებით, გამომძიებლები მისი უფლებამოვალეობებით დაინტერესდნენ, როცა ის სამეგრელო-ზემო სვანეთის მხარეში გუბერნატორის მოადგილედ მუშაობდა.
გუბერნატორის ყოფილი მოადგილე სუსში 4 საათის განმავლობაში იკითხებოდა.
პარალელურად კი სუსში სამეგრელო-ზემო სვანეთის ყოფილი გუბერნატორი, ლევან შონიაც 5 საათის განმავლობაში იკითხებოდა. სუსის შენობა შონიამ უკომენტაროდ დატოვა, თუმცა იმის თქმა მოახერხა, რომ ყველა კითხვაზე რაც გამოძიებას აინტერესებდა პასუხები გასცა.
“კითხვები რაც იყო, ყველაფერზე გავეცი პასუხი. თუ საჭირო გახდება, ისევ დამიბარებენ“, – განაცხადა შონიამ გამოკითხვის დასრულების შემდეგ ჟურნალისტებთან.
15 სექტემბერს, სახელმწიფო უსაფრთხოების სამსახურში ზუგდიდის ყოფილი მერის, ლაშა გოგიასა და „დაიცავი საქართველოს“ ერთ-ერთი დამფუძნებლის კახა მიქაიას გარდა, ქრთამის აღების ფაქტზე დაწყებული გამოძიების ფარგლებში, ბიზნესმენი ზურაბ კვირკვიაც გამოკითხეს.
სკანდალური აუდიოჩანაწერი, რომელშიც ბიზნემენი ზურაბ კვირკვია ზუგდიდის უკვე ყოფილ მერს, ლაშა გოგიას ესაუბრება, რამდენიმე დღის წინ გავრცელდა. ჩანაწერში, ბიზნესმენი გოგიას ახსენებს, როგორ გადასცა გარიგების სანაცვლოდ მის მოადგილეს, გია გულორდავას 10 ათასი დოლარი კონვერტით. ასევე დამატებით როგორ ჩარიცხა კონკრეტულ საბანკო ანგარიშზე 30 ათასი ლარი.
გამოძიება აღნიშნულ საქმესთან დაკავშირებით გრძელდება. ჯერჯერობით კი მხოლოდ ერთი პირია დაკავებული. ბიზნესმენ ზურაბ კვირკვიას კლასელი და ბავშვობის მეგობარი, ამავე დროს მისი დაცვის უფროსი ზაზა ხასაია. ზაზა ხასაია ზუგდიდის პოლიციაში კრიმინალური პოლიციიას ხელმძღვანელობდა. 2012 წელს, ხელისუფლების შეცვლის შემდეგ კი მას აღნიშნული თანამდებობა დაატოვებინეს.
შეგახსენებთ, რომ ზუგდიდის მერმა ლაშა გოგიამ თანამდებობა 12 სექტემბერს დატოვა. ამის შესახებ მან თავის Facebook-ზე დაწერა. 11 სექტემბერს ლაშა გოგია სახელმწიფო უსაფრთხოების სამსახურში ააიპ „ბოტანიკური ბაღების მართვის ცენტრის“ საქმესთან დაკავშირებითაც გამოკითხეს.
სახელმწიფო უსაფრთხოების სამსახურის ანტიკორუფციულმა სააგენტომ, შესაძლო დანაშაულის გამოვლენის მიზნით, ზუგდიდის მერიის ააიპ „ბოტანიკური ბაღების მართვის ცენტრის” საქმიანობის შესწავლა რამდენიმე კვირის წინ დაიწყო.
