ბიზნესმენი ზურაბ კვირკვია სავარაუდოდ თბილისშია და დღეს დაიკითხება
გავრცელებული ინფორმაციით, თბილისში იმყოფება ბიზნესმენი, ზურა კვირკვია, რომელიც ზუგდიდის მერიის მაღალჩინოსნებს კორუფციაში ადანაშაულებს. მას მოწმის სახით სავარაუდოდ დღეს დაკითხავენ.
საუბრიდან, რომელიც ფარულად არის ჩაწერილი, ირკვევა, რომ რუსეთში მოღვაწე ქართველმა ბიზნესმენმა ზურაბ კვირკვიამ, აუქციონში გამარჯვების სანაცვლოდ, წინასწარ ზუგდიდის მერის მოადგილეს ქრთამი მისცა, თუმცა პირობა დაირღვა და ზურაბ კვირკვიას სასურველი ტერიტორიები არ გადაეცა.
გია გულორდავა იმ ფარული ჩანაწერების ერთ-ერთი მთავარი ფიგურანტია. ის გუშინ სახელმწიფო უსაფრთხოების სამსახურში 9 საათის განმავლობაში იკითხებოდა. გავრცელებული ინფორმაციით, გულორდავამ დაკითხვაზე კორუფციულ გარიგებასთან კავშირი სრულად უარყო.
დღეს სუსში გამოკითხვაზეა დაბარებული ზუგდიდის მერიც, რომლის მიმართაც 338-ე, ქრთამის აღების მუხლით არის საქმე აღძრული.
