სენაკის მოსახლეობა სამართლებრივ დახმარებას უფასოდ მიიღებს
24.09.2020 / 24 სექტემბერი 2020
- დღეს ქვეყნის მასშტაბით იურიდიული დახმარების საკონსულტაციო 24-ე ცენტრი სენაკში გაიხსნა. დღეიდან ადგილობრივ მოსახლეობას საშუალება ეძლევა უფასოდ მიიღოს კვალიფიციური იურისტის კონსულტაცია ისეთ სამართლებრივ საკითხებზე, როგორიცაა: სოციალურად დაუცველთა და დევნილთა უფლებები; საბანკო ურთიერთობები; მიწის და უძრავი ქონების რეგისტრაცია; მემკვიდრეობა; შრომითი დავები; ქალთა მიმართ და ოჯახში ძალადობა და სხვა აქტუალური საკითხები.
ცენტრი სამუშაო ოფისით მუნიციპალიტეტის მერიამ უზრუნველყო და ის ხელოვნების ცენტრის სამუსიკო სკოლის შენობაში განთავსდება. იურიდიული დახმარების ცენტრის დირექტორმა რაჟდენ კუპრაშვილმა შეხვედრის მონაწილეებს გააცნო იურიდიული დახმარების სამსახურის სერვისები, საკუთრების რეგისტრაციასთნ დაკავშირებული საკითხები, უფასო სამართლებრივი დახმარების მიღების კრიტერიუმები, ასევე გაეროს უშიშროების საბჭოს რეზოლუციების განხორციელების 2018-2020 წლების საქართელოს ეროვნული სამოქმედო გეგმით გათვალისწინებულ საკითხებზე ისაუბრა.
შეხვედრას სენაკის მუნიციპალიტეტის მერი ლევან კუპრეიშვილი, პირველი მოადგილე გრიგოლ ბაღათურია, მოადგილე კახაბერ კუპრეიშვილი, საკრებულოს, მერიის სტრუქტურული ერთეულებისა და ადმინისტრაციულ ერთეულებში მერის წარმომადგენლები ესწრებოდნენ.
