ფოთის მუნიციპალიტეტის ნიკო ნიკოლაძის სახელობის სხდომათა დარბაზში ქალაქის მთავარი საფინანსო დოკუმენტის საჯარო განხილვა გაიმართა.

2026 წლის ადგილობრივი ბიუჯეტი განსაზღვრულია 49 მილიონ 320 ათასი ლარის ოდენობით, რაც წინა წლის დამტკიცებულ ბიუჯეტთან შედარებით 4 მილიონ 500 ათასი ლარით მეტია.

ზრდა შეეხება ჯანმრთელობის დაცვისა და სოციალურ მიმართულებას, ასევე ინფრასტრუქტურული პროექტების, განათლების და ახალგაზრდული პროგრამების დაფინანსებას.

ასევე, 2026 წელს მუნიციპალიტეტი მიიღებს დაახლოებით 30 მილიონი ლარის ტრანსფერს რეგიონული განვითარების ფონდიდან, რომელიც ინფრასტრუქტურულ პროექტებზე იქნება მიმართული.

შეხვედრაზე ქალაქის მერმა ბექა ვაჭარაძემ და საკრებულოს თავმჯდომარემ ალექსანდრე ტყებუჩავამ მოქალაქეთა წინადადებები მოისმინეს და დასმულ შეკითხვებს უპასუხეს.

ბიუჯეტის პროექტი საჯარო განხილვაზე ფოთის მუნიციპალიტეტის მერიის საფინანსო-საბიუჯეტო და შესყიდვების სამსახურის უფროსმა, ვასილ თოდუამ წარადგინა.