ზუგდიდის მეექვსე საჯარო სკოლის დირექტორის ია კერზაიას გათავისუფლებას პოლიტიკური შეხედულებების გამო უარყოფენ სკოლის პედაგოგები და STV-თან საუბარში აცხადებენ რომ, სკოლის დირექტორს სკოლაში პოლიტიკის შესახებ არასდროს უსაუბრია და ინფორმაცია რომელიც ვრცელდება სიმართლეს არ შეესაბამება.

ზუგდიდის მეექვსე საჯარო სკოლის სამეთვალყურეო საბჭოს მდივანი ამბობს რომ, ინსპექტირებამ სკოლაში აღმოაჩინა დარღვევები, რომელიც სისუფთავეს და ანტისანიტარიას ეხება. მისივე განცხადებით, აღნიშნული პრობლემის მოგვარება მარტივად შეიძლებოდა და გათავისუფლების საფუძველი ეს უნდა გამხდარიყო.

სკოლის საპირფარეშოში სისუფთავის პრობლემას ადასტურებენ სკოლის მოსწავლეებიც და აცხადებენ რომ როცა სკოლაში ინსპექტირება შემოვიდა, სწორედ იმ დღეს არ იყო წყალი.

ია კერზაიას შვილი, ბაჩანა შენგელია დედის ჯანმრთელობის მდგომარეობის გაუარესებას იმ პოლიტიკურ ზეწოლას უკავშირებს, რომელსაც, მისი მტკიცებით, კერძაია ხელისუფლებისგან განიცდიდა. არსებული ინფორმაციით, ზუგდიდის მეექვსე საჯარო სკოლაში მთელი რიგი დარღვევები გამოვლინდა, რომელთა შორის არის როგორც ადმინისტრაციული, ასევე ფინანსური გადაცდომები.

მეექვსე საჯარო სკოლასთან დაკავშირებით განცხადებას ავრცელებს განათლების, მეცნიერების, კულტურისა და სპორტის სამინისტროც, სადაც ნათქვამია, რომ სამინისტროს ინსპექტირების სამსახური რეგულარულად აწარმოებს სხვადასხვა სასწავლო დაწესებულების საქმიანობის შესწავლას სასწავლო-სააღმზრდელო პროცესის სრულყოფილად წარმართვისთვის.

“რაც შეეხება ზუგდიდის მე-6 საჯარო სკოლას, ინსპექტირების პროცესი, მოქალაქის განცხადების საფუძველზე, 2018 წლის 9 ნოემბრიდან 15 ნოემბრის ჩათვლით განხორციელდა. ინსპექტირების შედეგად, გამოვლინდა ადმინისტრაციული, ფინანსური და სანიტარულ-ჰიგიენური მძიმე დარღვევები. არსებული პროცედურის გათვალისწინებით, დარღვევების შესახებ დასკვნა შემდგომი რეაგირებისთვის გაეგზავნა სკოლის სამეურვეო საბჭოს.

სკოლის დირექტორის, ია კერზაიას თანამდებობიდან გათავისუფლების შესახებ გადაწყვეტილება საბჭომ არ მიიღო და ის ამჟამადაც სკოლის მოქმედი დირექტორია.

რაც შეეხება კონკრეტულ დარღვევებს, გამოვლენილია: სკოლის მიერ ქონების მესამე პირებზე გადაცემის შემთხვევა სამართლებრივი საფუძვლის გარეშე, შეფასების განხორციელება არალიცენზირებული აუდიტორული ორგანიზაციის მიერ, შემოსავლის სამსახურისთვის არასწორი ინფორმაციის მიწოდება, რომლის საფუძველზეც შემცირდა დასაბეგრი მოგება, სახელმწიფო შესყიდვების კანონმდებლობისა და სანიტარულ-ჰიგიენური ნორმების დარღვევა”,-აღნიშნულია სამინისტროს ოფიციალურ განცხადებაში.