ზუგდიდში საპენსიო სააგენტოს წარმომადგენლებმა საინფორმაციო შეხვედრა გამართეს და საპენსიო რეფორმის მნიშვნელობასა და დაგროვებითი საპენსიო რეფორმის მახასიათებლების შესახებ ისაუბრეს. როგორც სააგენტის ხელმძღვანელმა ლევან სურგულაძემ განაცხადა, საზოგადოებაში ინფორმაციის ნაკლებობაა ახალი საპენსიო რეფორმის შესახებ, თუმცა დაჩქარებულ რეჟიმში ეს პრობლემა აღმოიფხვრება.

მისივე თქმით, ახალი კანონი უკვე ძალაშია, ხოლო კანონის ზოგიერთი პუნქტები რომლებიც ითვალისწინებს შენატანების ადმინისტრირებას ძალაში პირველი იანვრიდან შედის.

რაც შეეხება ზოგადად რეფორმას, სურგულაძე ამბობს რომ რეფორმას აქვს ორი მნიშვნელოვანი უპირატესობა, პირველი ის რომ უზრუნველყოფს მომავალში ადამიანების ღირსეულ სიბერეს და ასევე უახლოეს მომავალში ეს ხელს შეუწყობს საქართველოში საინვესტიციო კაპიტალის გაჩენას, რაც ეკონომიკის ზრდაში აისახევა. შეხვედრას სამხარეო ადმინისტრაციის, ადგილობრივი თვითმმართველობების, არასამთავრობო ორგანიზაციების და რეგიონული მედიის წარმომადგენლები ესწრებოდნენ.