ხმაურისა და ურთიერთდაპირისპირების ფონზე ზუგდიდის საკრებულომ მუნიციპალიტეტის 2019 წლის ბიუჯეტი დაამტკიცა, რომელიც 34, 500.0 ათასი ლარს შეადგენს. ბიუჯეტის დამტკიცებას ოპოზიციური პარტიის წარმომადგენლებმა ევროპული საქართველოდან და ნაციონალური მოძრაობიდან მხარი არ დაუჭირეს. მათი თქმით, ბიუჯეტი მოსახლეობის საჭირბოროტო თემებზე არ არის მორგებული და თანხის დიდი ნაწილი ხელფასებსა და ადმინისტრაციულ საკითხებზე იხარჯება.

როგორც საკრებულოს თავმჯდომარე მამუკა წოწერიამ განაცხადა, ახალი ბიუჟეტი ხალხზეა მორგებული და მათი მთავარი პრიორიტეტი სოციალური მიმართულება, ჯანდაცვა, ინფრასტრუქტურა და განათლებაა.

სხდომას დეპუტატებთან ერთად, არასამთავრობო ორგანიზაციების წარმომადგენლებიც ესწრებიან. როგორც საერთაშორისო გამჭვირვალობა საქართველოს სამეგრელო ზემო სვანეთის წარმომადგებელმა არჩილ თოდუამ განაცხადა, ადგილობრივმა ხელისუფლებამ რეკომენდაციების ნაწილი გაითვალისწინა, რაც მისასალმებელია. მისივე თქმით, ბიუჟეტი არ არის პროგრამული და შესაბამისად ამ ნაწილში არსებული შეწორებები საკრებულომ არ გაითვალისწინა.