მაისში ზუგდიდში მერის არჩევნები გაიმართება, რომელიც მას შემდეგ გახდა ვაკანტური, რაც უკვე ყოფილმა მერმა, ლაშა გოგიამ თანამდებობა დატოვა. არჩევნებისთვის მზადება პოლიტიკურმა ძალებმა უკვე დაიწყეს, თუმცა მათ ჯერ კანდიდატურები ოფიციალურად არ წარუდგენიათ.

როგორც კულუარებიდან ირკვევა, უკვე გამოკვეთილია თუ ვინ იბრძოლებს ზუგდიდის მერობისთვის “ნაციონალური მოძრაობიდან” ნიკა მელია იბრძოლებს. აღსანიშნავია, რომ მელიას კანდიდატურის ალბათობას პარტიაში ჯერჯერობით არ ადასტურებენ.

რაც შეეხება მმართველ გუნდს, წინასაარჩევნოდ აქ ჯერ კიდევ შიდაპარტიული კვლევა მიმდინარეობს. STV-თვის ცნობილი გახდა 7 კაციანი სია, რომლის მიხედვითაც “ქართული ოცნება” სასურველი კანდიდატურის ცნობადობას საზოგადოებრივ წრეებში არკვევს.

სიაში, რომლითაც გამოკითხვა ტარდება პირველ ნომრად პრემიერის მრჩეველი, ირაკლი ჩიქოვანი წერია. ამ სიაში არიან ასევე ზუგდიდის საკრებულოს თავმჯდომარის მოადგილე ბესიკ ჭეჟია, ზუგდიდის მერის მოადგილე გიორგი შენგელია და სამეგრელო-ზემო სვენეთის გუბერნატორის მოადგილე მალხაზ თორიაც.

STV-ს ინფორმაციით შიდა პარტიული კვლევა სავარაუდოდ მარტის ბოლოს უნდა დასრულდეს, თუმცა კვლევის დასრულებამდე აქცენტები რამდენიმე კანდიდატურაზე კეთდება. როგორც ცნობილი ხდება, ირაკლი ჩიქოვანი მერის პოსტზე მისი კანდიდატურის დასახელებაზე უარს აცხადებს. რჩება ორი სავარაუდო კანდიდატი, რომელზეც არჩევანი მმართველმა გუნდმა უნდა გააკეთოს, თუმცა მარტის ბოლომდე არ არის გამორიცხული ყველაფერი შეიცვალოს.

ამ დროისთვის მთავარ ფიგურანტებად ზუგდიდის მერის მოადგილე გიორგი შენგელია და სამეგრელო-ზემო სვანეთის გუბერნატორის მოადგილე მალხაზ თორია რჩებიან. მარტის ბოლოს კი მმართველი გუნდი საკუთარ ფავორიტზე საბოლოოდ დადებს ფსონს.