20 აპრილს, 18:00 საათზე, ზუგდიდის მუნიციპალიტეტის ხელოვნებისა და კულტურის განვითარების ცენტრი სიმღერისა და ცეკვის ანსამბლ ,,ჩელას“ 50 წლის საიუბილეო თარიღს მასშტაბური ღონისძიებით აღნიშნავს. ამავე დღეს, ლეგენდარული სუხიშვილების ანსამბლის წევრების, ძმების, ლერი, ჯემალ და თამაზ მოსიების ვარსკვლავი გაიხსნება.

თამაზ მოსია, ამჟამად, ანსამბლ ,,ჩელას“ სამხატვრო ხელმძღვანელია. ხელოვნებისა და კულტურის განვითარების ცენტრის საკონცერტო დარბაზის ფოიეში ,,ჩელას“ ლოტბარების, სამხატვრო ხელმძღვანელების, ქორეოგრაფებისა და უხუცესი მოცეკვავეების ფოტო-მასალა გამოიფინება, რაც, შემდეგ, ცენტრის მუზეუმში გადაინაცვლებს. სიმღერისა და ცეკვის ანსამბლმა ,,ჩელამ“ ტრიუმფით მოიარა ყოფილი საბჭოთა კავშირისა და ევროპის ქვეყნები. მოპოვებული აქვს ოქროსა და ვერცხლის მედლები, მრავალი კონკურს- ფესტივალის ლაურეატია და მის შესახებ რამდენიმე ფილმიცაა გადაღებული.

ანსამბლმა თაობებს შემოუნახა ხალხური სიმღერისა და ცეკვის უნიკალური ნიმუშები. საიუბილეო საღამოს სამეგრელო-ზემო სვანეთის სახელმწიფო რწმუნებული – ალექსანდრე მოწერელია და ზუგდიდის მუნიციპალიტეტის მერის პირველი მოადგილე, გიორგი შენგელია თვითმმართველობის სხვა წარმომადგენლებთან ერთად დესწრებიან.

მოწვეულ სტუმრებში იქნებიან ფოლკლორის ცენტრისა და ქორეოგრაფთა კავშირის წარმომადგენლებიც.