“არ ვამართლებ თუნდაც პროსახელისუფლებო ჟურნალისტების ლანძღვას”, – ასეთ კომენტარს უწერს ჟურნალისტ მალხაზ ბასილაიას “ნაციონალური მოძრაობის” ზუგდიდის ორგანიზაციის თავმჯდომარე ანი წითლიძე, რომელიც ჟურნალისტის მიერ სოციალურ ქსელში დაწერილ სტატუსს გამოეხმაურა.

“თქვენ ხართ ნარკომანი, კრიმინალი და უსაქმური. გაიპარსე, ცოტა მოწესრიგდი და მერე დამელაპარაკე. არ ინერვიულოთ თქვენ….ცოტა უფრო დავარცხნილი ხალხი გამოუშვან ხოლმე, რა ყველა ერთი სახით არის, გეგონება, ყველა ერთი ყალიბიდან არის ჩამოსხმული”, – ამ სიტყვებით საქართველოს ყოფილმა პრეზიდენტმა ჟურნალისტს მიმართა. მიხეილ სააკაშვილი ზუგდიდში, ფაიფურის დასახლებაში დევნილებს სკაიპის საშუალებით პირდაპირ ეთერში ჩაერთო, სადაც მედიის წარმომადგენელმა, მალხაზ ბასილაიამ კითხვის დასმა ითხოვა, თუმცა მას ამის შესაძლებლობა არ მისცეს.

ექსპრეზიდენტმა ბასილაიასთვის სიტყვიერი შეურაცხყოფის  მიყენების შემდეგ, შეკრებილ მხარდამჭერებს პირობა მისცა, რომ  ზუგდიდში, შუალედურ არჩევნებში სანდრა რულოვსის გამარჯვების შემთხვევაში, ყველა  ოპოზიციურად განწყობილ ჟურნალისტს მედიას ჩამოაშორებენ.