საარჩევნო პროცესში „ქართული ოცნების“ აქტივისტების მხრიდან არც ერთი დარღვევა არ ფიქსირდება, – ამის შესახებ ზუგდიდში, “ქართული ოცნების“ საარჩევნო შტაბის ხელმძღვანელმა ირაკლი ჩიქოვანმა პარტიის წარმომადგენლებისთვის გადაცემულ ამომრჩეველთა სიებთან დაკავშირებით განაცხადა.

მან ხაზგასმით აღნიშნა, რომ სიების გამოყენებასთან დაკავშირებით სამართლებრივი შეზღუდვა არ არსებობს.

„აღნიშნულ სიაში არც ერთი მონაცემი პირად მონაცემს არ წარმოადგენს. შესაბამისად, სიებთან დაკავშირებით არავითარი დარღვევა არ არსებობს. ეს არის მიღებული პრაქტიკა ძალიან ბევრ ქვეყანაში და ამ პრაქტიკას არჩევნების ორგანიზებულად ჩატარებისთვის ვიყენებთ“, – განაცხადა ირაკლი ჩიქოვანმა.

ჩიქოვანმა ამომრჩეველს კიდევ უფრო მაღალი აქტივობისკენ მოუწოდა და აღნიშნა, რომ მაღალი აქტივობის პირობებში “ქართული ოცნება“ არჩევნებში დღესვე იმარჯვებს. ჩიქოვანის შეფასებით, “ქართული ოცნება“ ზუგდიდში დამაჯერებლად იმარჯვებს.

ზუგდიდში მერის რიგგარეშე არჩევნები ტარდება.