ახალციხეში, ციხის ტერიტორიაზე, საქართველოს ხალხური და გამოყენებითი ხელოვნების სახელმწიფო მუზეუმი, საქართველოს ტრადიციული რეწვის ასოციაციასთან თანამშრომლობით, ტრადიციული რეწვის სახელოსნოების მეორე საერთაშორისო ფესტივალი მიმდინარეობს. ფესტივალის მონაწილეები სამეგრელო-ზემო სვანეთის მუნიციპალიტეტების რეწვის ოსტატები, მათ შორის, ზუგდიდიდან, თენგიზ მიქენაია, რობერტ აბსანძე და ვახტანგ კუტალია არიან. ფესტივალს ზუგდიდის მუნიციპალიტეტის ძეგლთა დაცვის განყოფილების უფროსი ლაშა ჯიქია და ხელოვნებისა და კულტურის განვითარების ცენტრის თანამშრომელი, ხელოვნებათმცოდნე გულიკო ჩიქობავა ესწრებიან. ფესტივალის ფარგლებში, სამეგრელო-ზემო სვანეთის ტრადიციული რეწვის სახელოსნოების გზამკვლევების პრეზენტაციაც გაიმართება.

ტრადიციული რეწვის სახელოსნოების ნაკეთობების (ნიმუშების) გამოფენა-გაყიდვასთან ერთად, წარმოდგენილია ექსპონატები სამუზეუმო კოლექციებიდან, ასევე, საგანმანათლებლო პროგრამები ბავშვებისთვის, მიმდინარეობს საჯარო ლექციები და ტრეინინგები რეწვის ოსტატებისათვის. ფესტივალს მიწვეული ტურისტული სააგენტოებიც ესწრებიან და თითოეული სახელოსნოს პროდუქციასა და შეთავაზებებს ეცნობიან.

ფესტივალის ფარგლებში მოეწყო ადგილობრივი და საერთაშორისო ტრადიციული რეწვის სახელოსნოების და ოსტატების საქმიანობის სადემონსტრაციო აქტივობები – ღია მასტერკლასები (კერამიკის ამოყვანა და მოხატვა, მეიარაღეობა, ბუნებრივი საღებავებით ღებვა, ფარდაგის ქსოვა, თელვა, ქსოვილების დაჩითვა, მუსიკალური საკრავების დამზადება და სხვა). მასტერ-კლასებს ატარებენ ტრადიციული რეწვის მოწვეული ოსტატები საქართველოდან, სომხეთიდან, აზერბაიჯანიდან, რუმინეთიდან, ყაზახეთიდან, უზბეკეთიდან და სხვ.

ამასთანავე, ტურიზმის თანამედროვე ტენდენციების შესაბამისად, სულ უფრო მეტი ინტერესი ჩნდება ტრადიციული რეწვის ინტერაქტიული სახელოსნოებისადმი. სახელოსნოების მზარდ ეკონომიკურ პოტენციალზე მეტყველებს ტრადიციული რეწვის სახელოსნოს არაერთი წარმატებული მაგალითი საქართველოში.

ფესტივალი ხორციელდება საქართველოს განათლების, მეცნიერების, კულტურისა და სპორტის სამინისტროს, ასევე, USAID პროექტის ,,ზრდა საქართველოში” მიერ და ის ხვალ, 30 ივნისს დასრულდება.