ზუგდიდის მუნიციპალიტეტში საგზაო ინფრასტრუქტურა წესრიგდება. გზების სარეაბილიტაციო სამუშაოები აქტიურად მიმდინარეობს ბაღმარანსა და ჩხოუშში. სამუშაოების მიმდინარეობას ზუგდიდის მუნიციპალიტეტის მერის პირველი მოადგილე გიგა ფარულავა გაეცნო.

ჩხოუშის ადმინისტრაციულ ერთეულში გზის რეაბილიტაცია 2 ეტაპად ხორციელდება, მიმდინარე წელს რეაბილიტირდება 600 მეტრი გზა, იგება ბეტონის საფარი, გზის რეაბილიტაციის პირველი ეტაპის სამუშაოებზე 500 000 ლარი იხარჯება. გზის რეაბილიტაცია მიმდინარეობს ბაღმარანშიც, საავტომობილო გზის სიგრძე 4,8 კილომეტრია.

ასფალტო-ბეტონის საფარის დაგებასთან ერთად გათვალისწინებულია სანიაღვრე არხების მოწყობა. პროექტის სახელშეკრულებო ღირებულება 1,6 მილიონ ლარს შეადგენს. პროექტი 2 ეტაპიანია და სამუშაოების მეორე ეტაპი 2020 წელს განხორციელდება. გზის მშენებლობა რეგიონებში განსახორციელებელი პროექტების ფონდის დაფინანსებით ხორციელდება.

აგრეთვე, სოფლის მხარდაჭერის პროგრამის ფარგლებში, ოთახის რეაბილიტაცია მიმდინარეობს ბაღმარანის საბავშვო ბაღში. სარეაბილიტაციო სამუშაოებზე 10 107 ლარი იხარჯება. გიგა ფარულავა სამუშაოების დადგენილ ვადებში, მაღალი სტანდარტების დაცვით შესრულების ხარისხს სისტემატურად დააკვირდება.