“სკოლა-მაღაზია” წალენჯიხის რაიონის სოფელ ჯგალში, კანთის უბანში მდებარეობს. ყოველდღიურად ამ სკოლაში თავდაპირველად 19 მოსწავლე ირიცხებოდა და 11 პედაგოგი ამ წუთებშიც არის დასაქმებული, თუმცა პირობების არარსებობის გამო სკოლის მოსწავლეთა უმრავლესობამ კანთის სკოლა დატოვა და ჯგალის საჯარო სკოლაში გადაინაცვლა.

სწავლება კანთის სკოლაში პირველიდან მეექვსე კლასის ჩათვლით, კომბინირებულ კლასებში მიმდინარეობს. როგორც პედაგოგები აცხადებენ, სასწავლო პროცესი არც ერთი დღით არ შეფერხებულა. როგორც თავად აღნიშნავენ, კანთელები გაკვეთილებს იშვიათად აცდენენ.

ძველი მაღაზია ოთხ საკლასო ოთახადაა დაყოფილი, სადაც სხვადასხვა კლასებია განთავსებული და სასწავლო პროცესის ნორმალურად ჩატარება შეუძლებელია.

3 წლის წინ კანთის უბნელებს ხის დიდი სკოლა ჰქონდათ, თუმცა გაურკვეველ ვითარებაში გაჩენილ ხანძარს მხოლოდ რამდენიმე მერხი გადაურჩა. დღეს ეს ინვენტარი მაღაზიის მთავარი ინფრასტრუქტურული ნაწილია. მერხები ძველი და თითქმის უვარგისია. თავდაპირველად მაღაზიაში ელექტროენერგიაც არ მიეწოდებოდათ, რაც მძიმე პირობებს კიდევ უფრო ამძიმებდა.

ადგილობრივების განცხადებით კანთის სკოლა ღვთისგანაც დავიწყებულია, თუმცა ერთხელ, წინასაარჩევნოდ, მათ მაშინდელი პრეზიდენტობის კანდიდატი და განათლების ყოფილი მინისტრი გიორგი მარგველაშვილი სტუმრობდა. პედაგოგები მასთან გადაღებულ ფოტოსაც და დანაპირებსაც სათუთად დღემდე ინახავენ.