მარტვილის მუნიციპალიტეტის სოფელ ინჩხურში ჩატეხილი ხიდის აღდგენითი სამუშაოები შეჩერებულია. მიზეზად კი სამუშაოების მწარმოებელი კომპანიის წარმომადგენლების  გაქცევა სახელდება.

ცნობისათვის, ცენტრალურ ავტომაგისტრალთან  დამაკავშირებელი  ხიდი 8 თვის წინ ჩატყდა და მას შემდეგ სოფელი ორადაა გაყოფილი.

აღნიშნული ხიდის არარსებობის გამო, სოფელში ვერ გადაადგილდება სასწრაფო დახმარების მანქანა, უამინდობისას კი სოფლის ერთ ნაპირზე მცხოვრები მოსწავლეები სკოლაში წასვლას ვერ შეძლებენ.

ხიდის აღდგენითი სამუშაოებისთვის 40 000 ლარი გამოიყო. აქედან 85% კომპანია „ელ გრუპის“ ანგარიშზე უკვე გადარიცხულია. ადგილობრივ ხელისუფლებაში აცხადებენ, რომ უახლოეს მომავალში ტენდერს გამოაცხადებენ, რის შემდეგაც შესაძლებელი გახდება ხიდის აღდგენითი სამუშაოების გაგრძელება.