სენაკის სამხატვრო გალერეაში, ორგანიზაცია PEOPLE IN NEED-ის პროექტის – ,,ადამიანის უფლებები დოკუმენტური ფილმებით’’ დახურვის ცერემონიალი გაიმართა.

პროექტი, სენაკის მუნიციპალიტეტში, 22 თვის მანძილზე ხორციელდებოდა და მისი ადგილობრივი პარტნიორები იყვნენ: მუნიციპალიტეტის მოსწავლე-ახალგაზრდობისა და კულტურის ცენტრი, სენაკის სათემო განათლების ცენტრი, გარემოსდაცვითი ეკოლოგიური ასოციაცია ,,დეა’’ და ასოციაცია ,,ათინათი’’.

პროექტი, რომელიც მიზნად ისახავდა ადამიანის უფლებების დაცვასა და ხელშეწყობაში ადგილობრივი არასამთავრობო ორგანიზაციების მხარდაჭერას, მიმართული იყო მუნიციპალიტეტში ახალგაზრდებთან მომუშავე არასამთავრობო ორგანიზაციების შესაძლებლობების გაძლიერებისკენ, ადამიანის უფლებების დაცვის საქმეში ახალგაზრდების გააქტიურებისკენ,  5 დოკუმენტური ფილმის მეშვეობით სპეციფიურ ფოკუსში ქვეყანაში ადამიანის უფლებებთან დაკავშირებული გამოწვევების მოქცევისკენ.

შემაჯამებელ ღონისძიებაზე, რომელსაც სენაკის მუნიციპალიტეტის მერის პირველი მოადგილე გრიგოლ ბაღათურია, განათლების კულტურის, სპორტისა და ახალგაზრდობის სამსახურის უფროსი გივი მისაბიშვილი, მოსწავლე-ახალგაზრდობისა და კულტურის ცენტრის დირექტორი ლევან უჩანეიშვილი, არასამთავრობო სექტორის, პროექტში მონაწილე ზოგადსაგანმანათლებლო სკოლების პედაგოგები და მოსწავლეები ესწრებოდნენ, პროექტის ფარგლებში გაწეული აქტივობების არსსა და შედეგებზე ისაუბრეს PEOPLE IN NEED-ის მენეჯერმა ანა ქოჩუამ, ასოციაცია ,,ათინათის’’ წარმომადგენელმა სალომე ჟვანიამ, სახალხო დამცველის აპარატის წარმომადგენელმა სამეგრელოში ლევან პაპავამ და საქართველოს ახალგაზრდა იურისტთა ასოციაციის ზუგდიდის ოფისის ხელმძღვანელმა ჯანო ჭკადუამ.

,,ადამიანის უფლებები დოკუმენტური ფილმებით’’, რომელიც  ჩეხეთის საგარეო საქმეთა სამინისტროს დაფინანსებით და  საქართველოს სახალხო დამცველის  ადამიანის უფლებათა აკადემიის პარტნიორობით,  სენაკისა და გორის მუნიციპალიტეტებში განხორციელდა,  2018 წლის მარტში დაიწყო და 2019 წლის დეკემბერში დასრულდა.