ანაკლიაში ქვიშის ქარი მძვინვარებს. საკურორტო ზონა შესაძლოა ეკოლოგიური კატასტროფის წინაშე დადგეს. მიზეზი  კი ანაკლიის პორტის ტერიტორიაზე მშენებლობისას ზღვის ფსკერიდან ქვიშის ამოღებაა, რის შემდეგაც ადგილზე სამუშაოები შეჩერდა. ნარჩენ ქვიშის მტვერთან გამკლავება კი ყოველ ქარიან ამინდში მოსახლეობას საკუთარი ძალით უწევს.

ადგილობრივების თქმით თუ პრობლემა არ გამოსწორდა, ისინი ერთადერთ შემოსავლის წყაროს დაკარგავენ, რადგან მსგავს პირობებში ტურისტები ანაკლიაში არ ჩავლენ.

ცნობისთვის, ანაკლიის პორტის მშენებლობისათვის 5 მილიონი კუბი ქვიშა ზღვის ფსკერიდან ამოიღეს და ამ ქვიშით 60 ჰექტარი ჭაობი დაფარეს. სახელმწიფოს მიერ „ანაკლიის განვითარების კონსორციუმთან“ ხელშეკრულების გაუქმების შემდეგ,  მშენებლობა გაურკვეველი ვადითაა შეჩერებული.