საქართველოს სახელმწიფო უსაფრთხოების სამსახურის თანამშრომლების მიერ ქრთამის აღების ფაქტზე მიმდინარე გამოძების ფარგლებში დაკავებული ზაზა ხასაია თბილისის საქალაქო სასამართლომ 5 ათას ლარიანი გირაოს სანაცვლოდ დღეს გაათავისუფლა.

როგორც უწყების მიერ გავრცელებულ ინფორმაციაშია აღნიშნული, ჩატარებული საცხოვრებელი სახლების და მანქანების ჩხრეკის შედეგად, დაკავებულია მოქალაქე ზაზა ხ. „სახელმწიფო უსაფრთხოების სამსახურის ანტიკორუფციულ სააგენტოში მიმდინარეობს გამოძიება ქრთამის აღების ფაქტზე, საქართველოს სსკ-ის 338-ე მუხლით. მიმდინარე გამოძიების ფარგლებში, ჩატარებული საცხოვრებელი სახლების და მანქანების ჩხრეკის შედეგად, დაკავებულია მოქალაქე ზაზა ხ. აღნიშნულ საქმესთან დაკავშირებით საგამოძიებო მოქმედებები გრძელდება“,- აღნიშნულია სუს-ის განცხადებაში.

STV-ს  ინფორმაციით, ზუგდიდის მკვიდრი, ზაზა ხასაია გამოძიება იარაღის უკანონო შენახვა- ტარებას ედავება.

ცნობისათვის, ზაზა ხასაია ბიზნესმენ ზურაბ კვირკვიას ბავშვობის მეგობარი და მისი პირადი დაცვის უფროსია. კვირკვია “ფარული ჩანაწერების” საქმეში ერთ-ერთი ფიგურანტია.