ზუგდიდის მუნიციპალიტეტის საკრებულოს წევრის სანდრო სორდიას ინიციატივით, 2020 წლის ბიუჯეტში აისახა ,,მწვანე ბიუჯეტის“ კონცეფცია, რაც გულისხმობს ე.წ. ბინათმესაკუთრეთა ამხანაგობის პროექტის ერთგვარ ანალოგიას ქალაქის ადმინისტრაციულ საზღვრებში მდებარე ქუჩებსა და უბნებში.

ზუგდიდის მუნიციპალიტეტის საკრებულოში „მწვანე ბიუჯეტის“ საბჭოს სხდომა გაიმართა, სადაც დღის წესრიგით გათვალისწინებული სხვადასხვა საკითხი განიხილეს.

„მწვანე ბიუჯეტის“ დებულებაში შედის ცვლილებები, კერძოდ: პროექტის ღირებულებაზე დაწესებული ზედა ზღვარი 10 000 (ათი ათასი) ლარიანი ლიმიტი უქმდება, ხოლო საინიციატივო ჯგუფის მიერ გადასახდელი ჯამური ღირებულების 10%-იანი ბარიერი 5%-მდე დაიწევს. ასევე საპროექტო განაცხადების მიღების ვადა, ნაცვლად 25 მაისისა გაგრძელდება 10 ივნისამდე.

შეგახსენებთ, რომ „მწვანე ბიუჯეტის“ საპროექტო განაცხადები 10 ივნისის ჩათვლით მიიღება ზუგდიდის მუნიციპალიტეტის საკრებულოში (ქ.ზუგდიდი, ზვიად გამსახურდიას გამზ. #45, II სართული) ან შემდეგ ელექტრონულ მისამართზე: sakrebulozugdidi@gmail.com

პროექტში მონაწილეობისათვის აუცილებელია ზუგდიდის მუნიციპალიტეტის ქალაქის ადმინისტრაციულ საზღვრებში არსებულ ქუჩებსა და უბნებში შეიქმნას საინიციატივო ჯგუფები, რომლებიც მუნიციპალიტეტს მიმართავენ გამწვანების პროექტებითა და სავარაუდო ხარჯთაღრიცხვით, ხოლო მუნიციპალიტეტი, თავის მხრივ, უზრუნველყოფს აღნიშნული პროექტების თანადაფინანსებას პროექტის საერთო ღირებულების 95 პროცენტი.

საწყის ეტაპზე, ბიუჯეტში აღნიშნული პროგრამის განსახორციელებლად გამოიყო 100 000 (ასი ათასი) ლარი.

ზუგდიდის მუნიციპალიტეტის საკრებულოში შექმნილია „მწვანე ბიუჯეტის“ საბჭო, რომელიც მოახდენს შემოსული განაცხადების ვერიფიკაციას და განსაზღვრავს პროექტის განხორციელებისთვის საინიციატივო ჯგუფის ფინანსური თანამონაწილეობის ოდენობას.
საბჭოს მუშაობაში მონაწილეობის მიღება სათათბირო ხმის უფლებით ნებისმიერ დაინტერესებულ პირს შეუძლია.

#ერთად_გავამწვანოთ_ზუგდიდი!

დაინტერესების შემთხვევაში დაგვიკავშირდით: 591 44 53 27 – სანდრო სორდია – საკრებულოს წევრი.