• დილიდან ბლოკირებულია ზუგდიდის მერიის შესასვლელი, სადაც ბიზნესმენი მანანა მიქავა და მისი უფლებადამცველი საპროტესტო აქციას მართავენ. ისინი ზუგდიდის მერიას მის წინააღმდეგ განხორციელებულ უკანონო ქმედებაში ადანაშაულებენ და აცხადებენ რომ იმ ფონზე როცა დავა საკონსტიტუციო სასამართლოში გრძელდება, ზუგდიდის მერია უახლოეს დღეებში აპირებს ტერიტორიის შემოღობვას.

საქმე ეხება მდინარე ჩხოუშის ნაპირთან მდებარე 9 ათას კვადრატულ მეტრ ფართობს, რომელიც მანანა მიქავას წინა ხელისუფლების დროს იჯარით 150 000 დოლარად გადაეცა. მას 4 მილიონიანი ინვესტიცია უნდა განეხორციელებინა, თუმცა ვალდებულებები ვერ განახორციელა და ხელშეკრულება გაუუქმეს. აღნიშნული გადაწყვეტილება მიქავამ გაასაჩივრა, რის შემდეგაც ორივე ინსტანციის სასამართლომ, ბიზნესმენის საჩივარი ნაწილობრივ დააკმაყოფილა და საკრებულოს დაავალა ახალი ინდივიდუალური ადმინისტრაციული სამართლებრივი აქტის გამოცემა.

მოგვიანებით, მერიამ მას ორთვიანი ვადა მისცა, თუმცა ბიზნესმენმა ვალდებულებები ისევ ვერ შეასრულა. საბოლოოდ, აღნიშნული ტერიტორია ზუგდიდის მერიის ბალანსზე დარჩა.

ცნობისთვის, მანანა მიქავა ის ბიზნესმენია, რომელსაც ათეულობით კრედიტორი თაღლითურად მოტყუებაში ადანაშაულებდა. 2013 წელს ისინი აცხადებდნენ, რომ ბიზნესმენ მანანა მიქავას მიერ მოტყუებულები არიან და საქმის ხელახალ გამოძებას ითხოვენ. საქმის ხელახალ გამოძიებას 400-მდე დაზარალებული ოჯახი ითხოვდა.