• დღეს, სენაკის მეორე ქვეითი ბრიგადის კაპრალის, ლევან თეფანიას დაღუპვიდან 12 წელი გავიდა… სენაკის მუნიციპალიტეტის მერმა, ლევან კუპრეიშვილმა, პირველმა მოადგილემ, გრიგოლ ბაღათურიამ, მოადგილემ, კახაბერ კუპრეიშვილმა, განათლების, კულტურის, სპორტისა და ახალგაზრდობის სამსახურის უფროსმა, გივი მისაბიშვილმა კიდევ ერთხელ მიაგეს პატივი ქვეყნის ტერიტორიული მთლიანობისათვის ბრძოლაში დაღუპული სენაკელი ჯარისკაცის ხსოვნას.

წმინდა გიორგის სახელობის ტაძრის წინამძღვარმა, დეკანოზმა ავგუსტინე დუნდუამ, ლევან თეფანიასა და აგვისტოს ომის მსხვერპლთა სულების მოსახსენიებელი პანაშვიდი აღავლინა. 27 წლის ლევან თეფანია 9 აგვისტოს, საომარი მოქმედებების დროს, ცხინვალის მისადგომებთან, სოფელ ხეთაგუროვაში დაიღუპა. სენაკში გმირის სახელობის ქუჩაა, სადაც თეფანიების დიდ ოჯახში, ლევანის მეუღლესთან, ნატასთან, გოგონებთან – ნინისთან და მამის დაღუპვის შემდეგ ქვეყანას მოვლენილ მარიამთან ერთად, ბიძის მოსახელე ლევანი თეფანია იზრდება.

საერთო ტკივილმა დაამეგობრა თეფანიებისა და ბოკუჩავების ოჯახები. დღეს, გმირის საფლავთან, ამ ომს შეწირული, 25 წლის მეორე ქვეითი ბრიგადის კაპრალის, თემურ ბოკუჩავას ქვრივი, მაია ცეცხლაძე-ბოკუჩავამ, რომელიც ორი თვის ალექსით ხელში აღმოჩნდა უმძიმესი რეალობის წინაშე, რუსეთის აგრესიას შეწირული ბიჭების გმირობა გაიხსენა.