სენაკის მერმა “საქართველოს მოხალისე” სენაკელ ახალგაზრდებთან შეხვედრა გამართა
სენაკის მუნიციპალიტეტის მერი ლევან კუპრეიშვილი საქართველოს განათლებისა და მეცნიერების სამინისტროს ახალგაზრდული პოლიტიკის მართვის დეპარტამენტის, არასამთავრობო ორგანიზაცია ,,ჰელფინფ ჰენდისა“ და მოხალისეობის განვითარების პროგრამის – ,,საქართველოს მოხალისეს“ ფარგლებში ჩატარებულ კონკურსში გამარჯვებულ სენაკელ ახალგაზრდებს – ლარისა ნაჭყებიასა და ნიკოლოზ ქეცბაიას შეხვდა.
კონკურსის პირობების თანახმად, ქალაქ თბილისიდან 148 მოხალისე და საქართველოს 64 მუნიციპალიტეტიდან (ორი მოხალისე თითო მუნიციპალიტეტიდან) შეირჩა.
ლარისა ნაჭყებია და ნიკოლოზ ქეცბაია ის სენაკელი ახალგაზრდები არიან, რომელთაც მიენიჭათ ,,საქართველოს მოხალისის“ სტატუსი.
შეხვედრაზე ისაუბრეს ახალგაზრდებში სამოქალაქო ცნობიერების ამაღლებაზე, მათი ცოდნისა და უნარების გამოყენებით, საზოგადოებისათვის სასარგებლო საქმიანობის განხორციელებასა და ადგილობრივი მუნიციპალიტეტის საჭიროებიდან გამომდინარე, ისეთი ინიციატივების დაგეგმვაზე, როგორიცაა: მოხალისეთა კლუბების შექმნა, საქველმოქმედო საქმიანობა – სხვადასხვა საჭიროების მქონე ადამიანების დახმარება, ცხოვრების ჯანსაღი წესის პოპულარიზაცია, შშმ ბავშვების საზოგადოებაში ინტეგრაცია და სხვა.
მუნიციპალიტეტის მერმა ლევან კუპრეიშვილმა სენაკელ ახალგაზრდებს წარმატებები უსურვა და სამომავლო თანამშრომლობისთვის მზადყოფნა გამოთქვა.
