• ფოთს EURO 5-ის სტანდარტის ხუთი მუნიციპალური ავტობუსები გადაეცა. მუნიციპალიტეტი ჯამში 10 ახალ ავტობუსს მიიღებს. საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი სხვადასხვა მუნიციპალიტეტისთვის 175 ერთეული ავტობუსს შეიძენს.

ავტობუსების შესყიდვა საქართველოს ურბანული ტრანსპორტის განვითარების პროგრამის ფარგლებში ხორციელდება. პროგრამა ევროპის რეკონსტრუქციისა და განვითარების ბანკის (EBRD) ფინანსური მხარდაჭერით ხორციელდება და კონტრაქტის საერთო ღირებულება 18.7 მილიონ ევროს შეადგენს.

ახალი ავტობუსები სამეგრელო-ზემო სვანეთის სახელმწიფო რწმუნებულის მოვალეობის შემსრულებელმა მალხაზ თორიამ, მოადგილემ დავით ვერავამ, მუნიციპალიტეტის მერმა გოჩა კურდღელიამ, საკრებულოს თავმჯდომარემ ბექა ვაჭარაძემ და მუნიციპალური განვითარების ფონდის პროექტის მენეჯერმა დავით ჯიქიამ დაათვალიერს.

,,მუნიციპალური ტრანსპორტის განვითარების პროგრამის ფარგლებში, ინფრასტრუქტურის სამინისტროს მუნიციპალური განვითარების ფონდმა, ფოთის მუნიციპალიტეტს EURO 5-ის სტანდარტის 10 ავტობუსი გადასცა. მათგან ხუთი უკვე ჩამოვიდა და ოფიციალურად გადაეცა მუნიციპალიტეტს. კორონავირუსის გამო არსებული შეზღუდვების დასრულებისთანავე ეს ავტობუსები მოემსახურებიან ფოთელებს რაც ჩვენი მოსახლეობის კომფორტული მგზავრობისა და გადაადგილებისთვის მნიშვნელოვანია. ასევე მნიშვნელოვანია, რომ ფოთში უკვე დასრულდა ავტოპარკის მშენებლობა” – განაცხადა მალხაზ თორიამ.

სატრანსპორტო საშუალებები სრულად ადაპტირებულია შეზღუდული შესაძლებლობების მქონე პირებისთვის. ახალი ავტობუსები 8.5 მეტრიანია და გათვლილია 50 მგზავრზე. 175 ავტობუსი სხვადასხვა მუნიციპალიტეტს მომდევნო წლის გაზაფხულამდე ეტაპობრივად გადაეცემა. ახალი ავტობუსების მარშრუტებსა და სატრანსპორტო დერეფნებს მუნიციპალიტეტები განსაზღვრავენ.