მომავალი თაობის განვითარებისა და საუკეთესო პირობების შექმნისთვის, სენაკის მუნიციპალიტეტის სკოლამდელი აღზრდის სექტორში, უპრეცენდენტო მასშტაბის პროექტები განხორციელდა, მიმდინარეობს და იგეგმება.

2018-2021 წლებში აშენდა თანამედროვე სტანდარტების შესაბამისი 4 ახალი საბავშვო ბაღი; ქალაქად და სოფლად რეაბილიტირდა, კეთილმოეწყო, განახლდა და ახალი ინვენტარით აღიჭურვა 27-ვე საბავშვო და ბაგა-ბაღი. 2018 წელს – აშენდა 100 აღსაზრდელზე გათვლილი, თანამედროვე სტანდარტების შესაბამისი N 2 საბავშვო ბაღი; საბავშვო და ბაგა-ბაღების რეაბილიტაციისთვის დაიხარჯა 33 700 ლარი; წინა წლებთან შედარებით, სკოლამდელი აღზრდის გაერთიანების ბიუჯეტი 88 000 ლარით გაიზარდა; სკოლამდელი აღზრდის სექტორის თანამშრომლებს გაეზარდათ ხელფასები; საბავშვო და ბაგა-ბაღებში დაინერგა სამჯერადი კვება.

2019 წელს – საბავშვო და ბაგა-ბაღებში ჩატარებულმა სარეაბილიტაციო სამუშაოებმა 13 815 ლარი შეადგინა; 27-ვე საბავშვო და ბაგა-ბაღი ოთხჯერადი კვების რეჟიმზე გადავიდა; ჩატარდა N1 ბაგა-ბაღის შენობის სრული გადახურვის სამუშაოები, ღირებულებით – 110 ათასი ლარი; მუნიციპალიტეტის მერიის მიერ, „სოფლის მხარდაჭერის პროგრამის’’ ფარგლებში, ადმინისტრაციული ერთეულების სააღმზრდელო დაწესებულებებში დაფინანსდა და განხორციელდა შემდეგი სარეაბილიტაციო სამუშაოები: სრულად გადაიხურა კოტიანეთის საბავშვო ბაღი; სააღმზრდელო ოთახები რეაბილიტირდა უშაფათის, ძველი სენაკის, ნოქალაქევის, ნოსირის, მენჯის საბავშვო ბაღებში; განახლდა და გარემონტდა ძველი სენაკის №1, ძველი სენაკის №2, უშაფათის, მენჯის საბავშვო ბაღების სამზარეულოები და სასაწყობო ოთახები; მოეწყო საძინებლები ეკის საბავშვო ბაღში; დასრულდა შემოღობვის სამუშაოები გეჯეთის ბაღში; რეაბილიტირდა თეკლათის და ძველი სენაკის №1 საბავშვო ბაღების სახურავები; დასრულდა გათბობის სისტემების მონტაჟის პირველი ეტაპი ახალსოფლის და თეკლათის ბაღებში; გარემონტდა სააღმზრდელო ოთახები ნოსირის, ძველი სენაკის № 1, ხორშის და კოტიანეთის სააღმზრდელო დაწესებულებებში; მოეწყო სველი წერტილი ხორშის საბავშვო ბაღში; რეაბილიტირდა მენჯის საბავშვო ბაღის ფასადი; ადმინისტრაციული ერთეულების თითქმის ყველა ბაღში დაიწყო ეზოების საბავშვო ატრაქციონებით აღჭურვა.

ასევე განხორციელდა შემდეგი სარემონტო სამუშაოები: ელექტროგაყვანილობა გამოიცვალა კოტიანეთის საბავშვო ბაღში; შეიცვალა საკანალიზაციო მილები №2 საბავშვო ბაღში; შეკეთდა დაზიანებული ტუმბოები ახალსოფლის და ლეძაძამეს სააღმზრდელო დაწესებულებებში; რეაბილიტირდა ქალაქის №1, №2 და №6 ბაგა-ბაღების სააღმზრდელო ოთახები. 2020 წელს – პროექტის – ,,ეკონომიკური მონაწილეობა, საცხოვრებლით უზრუნველყოფა და სოციალური ინფრასტრუქტურა იძულებით გადაადგილებულ პირთა და მასპინძელი თემებისათვის’’ ფარგლებში, ყოფილი სამხედრო დასახლების ტერიტორიაზე, სრულად რეაბილიტირდა და აღიჭურვა 60 აღსაზრდელზე გათვლილი საბავშვო ბაღი ,,ოცნება”; პროექტი ლტოლვილთა დანიის საბჭომ, საქართველო-გერმანიის ფინანსური თანამშრომლობის ფარგლებში, განახორციელა.

27-ვე საბავშვო და ბაგა-ბაღში, 116 000 ლარის ღირებულების ფარგლებში, რეაბილიტირდა წყალგაყვანილობის სისტემები და კეთილმოეწყო სველი წერტილები; მოეწყო ელექტრო გაყვანილობის სისტემები და შეძენილ იქნა ელექტროქურები, რისთვისაც 96 000 ლარი დაიხარჯა; დაიწყო N 4 ბაგა-ბაღის ახალი კორპუსის მშენებლობა; COVID 19-ის პანდემიის პერიოდში, სკოლამდელი აღზრდის სექტორის 1307 აღსაზრდელს, 6 ეტაპად, დაურიგდა 275 000 ლარის ღირებულების საკვები პროდუქტები; სკოლამდელი აღზრდის სექტორის თანამშრომლებს გაეზარდათ ხელფასები. 2021 წელს – სენაკში, ჯიხას ქუჩაზე მდებარე, გასული საუკუნის 50-იან წლებში აგებული N5 ბაგა-ბაღის ამორტიზებული შენობის ადგილზე, აშენდა 60 აღსაზრდელზე გათვლილი, საჭირო ტექნიკით, ინვენტარით, ბუნებრივი აირითა და ცენტრალური გათბობით უზრუნველყოფილი, ახალი ბაგა-ბაღი; პროექტი მუნიციპალური განვითარების ფონდმა განახორციელა. ინტენსიურ რეჟიმში მიმდინარეობს N4 საბავშვო ბაღის სამშენებლო სამუშოები, რომლის დასრულების შემდეგ, საჭირო ტექნიკით, ინვენტარით, ბუნებრივი აირითა და ცენტრალური გათბობით უზრუნველყოფილი სააღმზრდელო დაწესებულება 100 აღსაზრდელს მოემსახურება; შენობა ადაპტირებული იქნება შეზღუდული შესაძლებლობების მქონე პირთათვის;

პროექტი ლტოლვილთა დანიის საბჭოსა (DRC) და საქართველო-გერმანიის ფინანსური თანამშრომლობის ფარგლებში ხორციელდება. გამოცხადდა ტენდერი ქალაქ სენაკში, ელიავას ქუჩაზე, N3 საბავშვო ბაღის ასაშენებლად, რომლის ანალოგი მუნიციპალიტეტში არ არსებობს; მასშტაბური სამშენებლო სამუშაოების დასრულების შემდეგ, კომფორტული და კეთილმოწყობილი, თანამედროვე სტანდარტების შესაბამისი ორსართულიანი სააღმზრდელო დაწესებულება 100 აღსაზრდელს მოემსახურება; შენობა ადაპტირებული იქნება შეზღუდული შესაძლებლობების მქონე პირთათვის; წლის უანალოგო პროექტის სავარაუდო ღირებულება 4 395 760 ლარს შეადგენს; უპრეცედენტო მასშტაბის პროექტს მუნიციპალური განვითარების ფონდი დააფინანსებს. ასევე იგეგმება N7 საბავშვო ბაღის მშენებლობა. ეს და სხვა საგანმანათლებლო ინფრასტრუქტურული პროექტები, აღსაზრდელთა განვითარებისათვის საუკეთესო პირობების შექმნას ემსახურება, რაც ხელისუფლების საქმიანობის უმნიშვნელოვანესი პრიორიტეტია.